ന്യൂഡൽഹി: വരൾച്ച ദുരിതാശ്വാസത്തിനായി സംസ്ഥാനത്ത് ക്രൗഡ് ഫണ്ടിംഗ് പ്രചാരണത്തിന് നേതൃത്വം നൽകുന്ന കർണാടക മുഖ്യമന്ത്രി സിദ്ധരാമയ്യയും സംസ്ഥാന മന്ത്രി സമീർ അഹമ്മദ് ഖാനും സ്വകാര്യ ആഡംബര വിമാനത്തിൽ യാത്ര ചെയ്തതിന് കോൺഗ്രസ് പാർട്ടിക്കെതിരെ രൂക്ഷമായ ആക്രമണവുമായി ഭാരതീയ ജനതാ പാർട്ടി.
ബിജെപിയുടെ മീഡിയ സെല്ലിന്റെ ചുമതലയുള്ള അമിത് മാളവ്യയാണ് കർണാടക കോൺഗ്രസ് നേതാക്കളെ രൂക്ഷമായി വിമർശിച്ച് സോഷ്യൽ മീഡിയയിൽ രംഗത്തെത്തിയത്. ഡൽഹിയിലെ വരൾച്ച ദുരിതാശ്വാസത്തിനായി പണം തേടുന്നതിനിടയിൽ അവർ ഒരു സ്വകാര്യ ജെറ്റിൽ “സന്തോഷകരമായ നിമിഷങ്ങൾ” ആസ്വദിക്കുകയാണ് കോൺഗ്രസ് നേതാക്കളെന്ന് മാളവ്യ ആരോപിച്ചു.
ഈ ധാരാളിത്തത്തെ ചൂണ്ടികാണിച്ചു കൊണ്ട് അവരുടെ പ്രവർത്തനങ്ങളും പൊതു സംഭാവനകൾക്കായുള്ള അവരുടെ അഭ്യർത്ഥനയും തമ്മിലുള്ള വ്യക്തമായ പൊരുത്തക്കേട് മാളവ്യ ഊന്നിപ്പറഞ്ഞു
കർണാടക മന്ത്രി സമീർ അഹമ്മദ് ഖാൻ മുഖ്യമന്ത്രി സിദ്ധരാമയ്യയ്ക്കൊപ്പമുള്ള ആഡംബര സ്വകാര്യ ജെറ്റ് യാത്ര കാണിക്കുന്ന വീഡിയോ പോസ്റ്റ് ചെയ്തതോടെയാണ് വിവാദം കത്തിപ്പടർന്നത് . തുടക്കത്തിൽ “സന്തോഷകരമായ നിമിഷങ്ങൾ” എന്ന തലക്കെട്ടോടെ സമീർ അഹമ്മദ് ഖാൻ തന്നെയാണ് വീഡിയോ പോസ്റ്റ് ചെയ്തത്.
സി ടി രവിയും ഷെഹ്സാദ് പൂനവല്ലയും ഉൾപ്പെടെയുള്ള പ്രമുഖ ബിജെപി നേതാക്കളും വിമർശനവുമായി രംഗത്തെത്തി. മുഖ്യമന്ത്രിയുടെ ആഡംബര യാത്രയ്ക്ക് പൈസയുണ്ട് എന്നാൽ വരൾച്ച കൊണ്ട് കഷ്ടപ്പെടുന്ന കർഷകർക്ക് ഫണ്ട് ഇല്ല. ഇത് സർക്കാരിന്റെ മുൻഗണകൾ എന്താണെന്ന് കാണിക്കുന്നു സി ടി രവി പറഞ്ഞു
