പത്തനംതിട്ട : തങ്ക അങ്കി ഘോഷയാത്രയുമായി ബന്ധപ്പെട്ട് നാളെ ശബരിമലയിലേക്കുള്ള വാഹനങ്ങൾക്ക് ഗതാഗത നിയന്ത്രണം ഉണ്ടാകും. ശബരിമലയിലെ പൂജാ സമയ ക്രമത്തിൽ മാറ്റമുള്ള സാഹചര്യത്തിൽ ഭക്തരെ നിലയ്ക്കൽ നിന്നു പമ്പയിലേക്ക് കടത്തിവിടുന്നതിന് പൊലീസ് നിയന്ത്രണം ഏർപ്പെടുത്തിയിട്ടുണ്ട്.
തിരുവിതാംകൂർ ദേവസ്വം ബോർഡ് ആണ് നിലയ്ക്കലിൽ നിന്നും ഭക്തരെ കടത്തിവിടുന്നതിൽ നിയന്ത്രണം ഏർപ്പെടുത്തിയിട്ടുള്ളതായി അറിയിച്ചത്. ഗതാഗത നിയന്ത്രണം ഉള്ളതിനാൽ നാളെ നിലക്കലിൽ വാഹനങ്ങൾ തടയുന്നതാണ്. നാളെ ഉച്ചപൂജയ്ക്കുശേഷം വൈകിട്ട് 5 മണിക്കായിരിക്കും ശബരിമല നട തുറക്കുക.
നാളെ രാവിലെ 11 മണിയ്ക്കുള്ളിൽ നിലയ്ക്കൽ എത്തുന്ന ശബരിമല തീർത്ഥാടകരുടെ വാഹനങ്ങൾ മാത്രമായിരിക്കും പമ്പയിലേക്ക് കടത്തിവിടുക. 11 മണിയ്ക്ക് ശേഷം നിലയ്ക്കലിൽ എത്തുന്ന വാഹനങ്ങൾക്ക് മൂന്നുമണിക്കൂർ എങ്കിലും നിലയ്ക്കൽ തന്നെ തുടരേണ്ടി വരും എന്ന് പോലീസ് അറിയിച്ചു.
തങ്ക അങ്കി ഘോഷയാത്രയുമായി ബന്ധപ്പെട്ടാണ് ശബരിമലയിൽ നാളെ ഉച്ചയ്ക്ക് ശേഷമുള്ള നടതുറപ്പ് വൈകുന്നത്. സാധാരണ ദിവസങ്ങളിൽ ശബരിമലയിൽ ഉച്ചയ്ക്ക് ശേഷമുള്ള നട തുറക്കൽ മൂന്ന് മണിക്കാണ് നടക്കാറുള്ളത്. എന്നാൽ ഡിസംബർ 26ന് തങ്ക അങ്കി ഘോഷയാത്ര നടക്കുന്നതിനാൽ വൈകിട്ട് അഞ്ചുമണിക്ക് മാത്രമായിരിക്കും നട തുറക്കുക.
Discussion about this post