കെ.​ഹ​രി​കൃ​ഷ്ണ​ന്‍റെ മ​ര​ണ​ത്തി​ൽ ദുരൂഹതയുണ്ട് ; പുനരന്വേഷണം വേണമെന്ന് സഹോദരങ്ങൾ

ആലപ്പുഴ : ​സോളാർ കേസിലെ അന്വേഷണ ഉദ്യോഗസ്ഥനായിരുന്ന റിട്ട. ഡിവൈഎസ്പി കെ.​ഹ​രി​കൃ​ഷ്ണ​നെ മരണപ്പെട്ട നിലയിൽ കണ്ടെത്തിയ സംഭവത്തിൽ ദുരൂഹതയുണ്ടെന്ന് സഹോദരങ്ങൾ ആരോപിച്ചു. അദ്ദേഹത്തിന്റെ മരണത്തെക്കുറിച്ച് പുനരന്വേഷണം നടത്തണമെന്നും സഹോദരങ്ങൾ ആവശ്യപ്പെട്ടു. കഴിഞ്ഞ ഏപ്രിൽ 29ന് ആയിരുന്നു ഹരികൃഷ്ണന്റെ മൃതദേഹം റെയിൽവേ സ്റ്റേഷന് സമീപം കണ്ടെത്തിയിരുന്നത്.

ഹരികൃഷ്ണന്റെ മരണത്തെ കുറിച്ചുള്ള അന്വേഷണത്തിൽ ലോക്കൽ പോലീസ് അലംഭാവം കാട്ടിയെന്നാണ് സഹോദരങ്ങളുടെ ആരോപണം. ഇത്രയും നാളും കാത്തിരുന്നിട്ടും പോലീസ് അന്വേഷണത്തിൽ യാതൊരു മുന്നേറ്റവും ഇല്ലാത്തതിനാൽ ആണ് ഇപ്പോൾ പുനരന്വേഷണത്തിന് ആവശ്യം ഉന്നയിക്കുന്നത് എന്നും സഹോദരങ്ങൾ വ്യക്തമാക്കി. പുനരന്വേഷണം ആവശ്യപ്പെട്ട് ഹരികൃഷ്ണന്റെ സഹോ​ദ​ര​ങ്ങ​ളാ​യ കെ.​മു​ര​ളീ​കൃ​ഷ്ണ​ൻ,സൗ​മി​നി ദേ​വി, ശോ​ഭ​ല​ത എ​ന്നി​വ​ർ മു​ഖ്യ​മ​ന്ത്രി​ക്കും ക്രൈം​ബ്രാ​ഞ്ച് എ​സ്പി​ക്കും പ​രാ​തി​ന​ല്കി.

​ഏ​പ്രി​ൽ 29ന് ​പു​ല​ർ​ച്ചെ 5.30 ഓ​ടെയാണ് ചേ​പ്പാ​ട് രാ​മ​പു​രം ദേ​വീ ക്ഷേ​ത്ര​ത്തി​നു ​ സമീപത്തെ റ​യി​ൽ​വേ ക്രോ​സി​ൽ കെ. ഹരികൃഷ്ണന്റെ മൃതദേഹം കണ്ടെത്തിയത്. റോ​ഡ​രി​കി​ൽ ഉ​പേ​ക്ഷി​ക്ക​പ്പെ​ട്ട നിലയിൽ അദ്ദേഹത്തിന്റെ കാ​റും കണ്ടെത്തിയിരുന്നു. ഹരികൃഷ്ണൻ ആത്മഹത്യ ചെയ്തതെന്നാണ് ലോക്കൽ പോലീസിന്റെ നിഗമനം.

പോലീസ് സേ​ന​യി​ൽ വി​ജ​യ​ക​ര​മാ​യി സേ​വ​നം പൂ​ർ​ത്തി​യാ​ക്കു​ക​യും നി​ര​വ​ധി വേ​ദി​ക​ളി​ൽ മ​നശാ​സ്ത്ര ക്ലാസു​ക​ൾ എ​ടു​ക്കു​ക​യും ചെ​യ്തി​ട്ടു​ള്ള തി​ക​ഞ്ഞ പ്രൊ​ഫ​ഷ​ണ​ലാ​യ ഹ​രി​കൃ​ഷ്ണ​ൻ ഒരിക്കലും ആത്മഹത്യ ചെയ്യില്ലെന്നാണ് സഹോദരങ്ങൾ വ്യക്തമാക്കുന്നത്. ആത്മഹത്യ ചെയ്യാൻ തക്ക യാതൊരു സമ്മർദ്ദവും അദ്ദേഹത്തിനുണ്ടായിരുന്നില്ല എന്നും മരണത്തിന് തൊട്ടു മുൻപുള്ള ദിവസങ്ങളിൽ പോലും ഏറെ സന്തോഷവാനായിരുന്നു ഹരികൃഷ്ണൻ എന്നും അദ്ദേഹത്തിന്റെ സഹോദരങ്ങൾ വ്യക്തമാക്കി.