അയോദ്ധ്യ:പ്രധാനമന്ത്രി അയോദ്ധ്യ സന്ദര്‍ശനത്തിനായി വരുന്നതില്‍ വളരെയധികം നന്ദിയുണ്ടെന്ന് ഉത്തര്‍പ്രദേശ് ഉപമുഖ്യമന്ത്രി ബ്രജേഷ് പഥക് . ഇന്ന് ഞങ്ങള്‍ക്ക് ഭാഗ്യ ദിനമാണെന്നും ,അയോദ്ധ്യ ലോകോത്തര നഗരമായി വികസിക്കുകയാണെന്നും അദ്ദേഹം പറഞ്ഞു.
കൂടാതെ അന്താരാഷ്ട്ര വിമാനത്താവളം ഉദ്ഘാടനം ചെയ്യുന്നതിലൂടെ ലോകമെമ്പാടുമുള്ള ശ്രീരാമഭക്തര്‍ക്ക് അയോദ്ധ്യയില്‍ വരാന്‍ സാധിക്കും. ഇവിടത്തെ അടിസ്ഥാന സൗകര്യങ്ങള്‍ എല്ലാം മാറി കൊണ്ടിരിക്കുകയാണെന്നും അദ്ദേഹം കൂട്ടിച്ചേര്‍ത്തു.ജഹ ജന്മേ പ്രഭു ശ്രീറാം ,സ്വച്ഛ് സുനാദ് രഹേ അയോദ്ധ്യധാം എന്ന മുദ്രാവാക്യം നല്‍കിയത് പ്രധാനമന്ത്രി മോദിയുടെ പ്രചോദനത്തോടെയാണ് എന്ന് യുപി ഉപമുഖ്യമന്ത്രി കേശവ് പ്രസാദ് മൗര്യ പറഞ്ഞു.
പ്രധാനമന്ത്രിയെ വരവേല്‍ക്കാന്‍ നാടന്‍ കലാകാരന്മാര്‍ ഒരുങ്ങികഴിഞ്ഞു.കൂടാതെ മഥുരയുടെ പ്രശസ്തമായ മയൂര്‍ നൃത്തം നിരവധി സേറ്റുജുകളിലായി അവതരിപ്പിക്കും.സുല്‍ത്താന്‍പൂരില്‍ നിന്നുള്ള നാടോടി നൃത്തം ,ഗൊരഖുപൂരില്‍ നിന്നുള്ള വാന്താംഗിയ നൃത്തം, റായി നൃത്തം എന്നിങ്ങനെയുള്ള പല തരത്തിലുള്ള നൃത്തങ്ങളും അവതരിപ്പിക്കും.മോദിയുടെ ഇന്നത്തെ സന്ദര്‍ശനത്തിന് മുന്നോടിയായി കനത്ത സുരക്ഷാ ക്രമീകരണങ്ങളാണ് ഒരുക്കിയിരിക്കുന്നത്.
ഭഗവാന്‍ ശ്രീരാമന്റെ നഗരമായ അയോദ്ധ്യ സമ്പന്നമായ പൈതൃകത്തെ സംരക്ഷിക്കാനും , ലോകോത്തര അടിസ്ഥാന സൗകര്യങ്ങള്‍ വികസിപ്പിക്കാനും കണക്റ്റിവിറ്റി മെച്ചപ്പെടുത്താനും സര്‍ക്കാര്‍ പ്രതിജ്ഞാബദ്ധമാണെന്ന് പ്രധാനമന്ത്രി നരേന്ദ്രമോദി എക്‌സില്‍ കുറിച്ചിരുന്നു.
15700 കോടിയുടെ വികസനപദ്ധതികള്‍ക്ക് തുടക്കമിടുന്ന അദ്ദേഹം,നവീകരിച്ച വിമാനത്താവളവും റെയില്‍വേസ്റ്റഷനും ഉദ്ഘോടനം ചെയ്യും. പ്രധാനമന്ത്രിയുടെ റോഡ് ഷോയും ഇന്ന് നടക്കും.പുതിയ അമൃത് ഭാരത് ട്രെയിനുകളുടെയും വന്ദേ ഭാരത് ട്രെയിനുകളുടെയും ഫ്‌ളാഗ് ഓഫ് കര്‍മം എന്നിവ പ്രധാനമന്ത്രി നിര്‍വഹിക്കും.
