പത്തനംതിട്ട : കൊവിഡ്കാലത്ത് തെറ്റായ പരിശോധനാഫലം നൽകിയ ലാബുകൾക്കെതിരെ നൽകിയ പരാതിയിൽ ഒടുവിൽ ആശ്വാസവിധി. പത്തനംതിട്ട ജില്ലാ ഉപഭോക്തൃ തർക്കപരിഹാര കമ്മീഷൻ ആണ് കൊവിഡ് കാലത്ത് തെറ്റായ പരിശോധനാഫലം നൽകിയ ലാബുകൾക്കെതിരെ പിഴ ചുമത്തിയത്. അടൂർ കെയർ സ്കാൻസ് ഡയഗണോസ്റ്റിക്കിനും തിരുവനന്തപുരം ആസ്ഥാനമായ ദേവി സ്കാൻസിനുമാണ് പിഴ ചുമത്തിയിരിക്കുന്നത്.
തെറ്റായ പരിശോധനാഫലം നൽകിയത് മൂലം വിദേശയാത്ര തടസ്സപ്പെട്ട് 1,79000 രൂപ നഷ്ടം സംഭവിച്ച യുവാവാണ് ലാബുകൾക്കെതിരെ ഉപഭോക്തൃ തർക്കപരിഹാര കമ്മീഷനെ സമീപിച്ചിരുന്നത്. 1,79000 രൂപ ഒമ്പത് ശതമാനം പലിശ സഹിതം നൽകണമെന്നാണ് കമ്മീഷന്റെ വിധി. തെറ്റായ പരിശോധനാഫലം നൽകിയ 2021 മെയ് 18 മുതലുള്ള പലിശ അടക്കം ലാബുകാർ പരാതിക്കാരനു നൽകണമെന്നാണ് ഉത്തരവ്.
ഇതോടൊപ്പം പരാതിക്കാരനായ യുവാവിന് 25000 രൂപ നഷ്ടപരിഹാരവും 10000 രൂപ കോടതി ചെലവും നൽകാനും കമ്മീഷൻ ഉത്തരവിട്ടു. വിദേശത്തേക്ക് പോകാൻ നടത്തിയ കൊവിഡ് പരിശോധന ഫലമാണ് തെറ്റായി നൽകിയത്. ഇതോടെ യുവാവിന്റെ യാത്ര തടസ്സപ്പെടുകയും വിമാന ടിക്കറ്റ് അടക്കമുള്ള വിഷയങ്ങളിൽ നഷ്ടം സംഭവിക്കുകയും ആയിരുന്നു.
Discussion about this post