ലക്നൗ : രാമക്ഷേത്രത്തിന്റെ പ്രാണ പ്രതിഷ്ഠാ ചടങ്ങിന് മുന്നോടിയായി തന്നെ അയോദ്ധ്യയാകെ ഇപ്പോൾ രാമമന്ത്ര മുഖരിതമാണ്. ജനങ്ങളുടെ രാമഭക്തിയോടുള്ള ആദരസൂചകമായി അയോദ്ധ്യയിലെ 7 പ്രധാന പ്രദേശങ്ങളിൽ എൽഇഡി സ്ക്രീനുകൾ സ്ഥാപിച്ച് രാമായണം ടെലിവിഷൻ പരമ്പര പ്രദർശിപ്പിക്കുകയാണ് ഇപ്പോൾ ഉത്തർപ്രദേശ് സർക്കാർ.
രാമായണത്തെ ഏറ്റവും ജനകീയമാക്കി സമൂഹത്തിന്റെ താഴെത്തട്ടിലുള്ള സാധാരണ ജനങ്ങളിലേക്ക് പോലും എത്തിക്കാൻ ആയതിൽ രാമാനന്ദ് സാഗർ ഒരുക്കിയ രാമായണം എന്ന ടെലിവിഷൻ പരമ്പരയ്ക്ക് വലിയ പങ്കുണ്ട് . രാമാനന്ദ് സാഗറിന്റെ ഈ രാമായണമാണ് ഉത്തർപ്രദേശ് സർക്കാർ അയോദ്ധ്യയിൽ 7 സ്ഥലങ്ങളിൽ വലിയ എൽഇഡി സ്ക്രീനുകളിൽ പ്രദർശിപ്പിക്കുന്നത്. ഡിസംബർ 25 മുതലാണ് രാമായണം പരമ്പരയുടെ പ്രദർശനം ആരംഭിച്ചത്.
1987നും 88 നും ഇടയിലായിരുന്നു ദൂരദർശനിൽ ആദ്യമായി രാമാനന്ദ സാഗർ രചനയും സംവിധാനവും നിർവഹിച്ച രാമായണം പരമ്പര സംപ്രേക്ഷണം നടന്നത്. ഏറെ ജനപ്രീതി നേടിയതിനാൽ ഈ പരമ്പര പിന്നീടും പലതവണ പുനഃസംപ്രേക്ഷണം ചെയ്യപ്പെട്ടു. 2020ലെ കൊറോണ ലോക്ക് ഡൗൺ സമയത്തും രാമാനന്ദ് സാഗറിന്റെ രാമായണം പുനഃസംപ്രേക്ഷണം ചെയ്യപ്പെട്ടു.
2020 ൽ ഈ പരമ്പര യൂട്യൂബിൽ അപ്ലോഡ് ചെയ്യപ്പെട്ടതിന് ശേഷം 7.7 കോടി കാഴ്ചക്കാരുമായി ലോകത്ത് ഏറ്റവുമധികം ആളുകൾ കണ്ട ടിവി ഷോയായി രാമാനന്ദ് സാഗറിന്റെ രാമായണം മാറിയിരുന്നു.
