സൂര്യന്റെ അടുത്തേക്ക് ചെല്ലുക എന്നുള്ളത് ആർക്കും ചിന്തിക്കാൻ പോലും കഴിയാത്ത കാര്യമാണ് അല്ലേ? സൂര്യന് സമീപത്തേക്ക് ആർക്കും ചെല്ലാൻ സാധിക്കാത്തതെന്താണെന്ന് അറിയാമോ? മനുഷ്യർ വസിക്കുന്ന ഈ ഭൂമിയിൽ നിന്നും 150 ദശലക്ഷം കിലോമീറ്റർ അകലെയാണ് സൂര്യൻ സ്ഥിതിചെയ്യുന്നത്. കൂടാതെ സൂര്യന്റെ ഉപരിതലം 5,726 ഡിഗ്രി സെൽഷ്യസ് ചൂട് വമിക്കുന്നതാണ്. തന്റെ അടുത്തേക്ക് എത്തുന്ന എന്തും ഒരുക്കി കളയാനുള്ള ശേഷി അതിനുണ്ട്.
കൂടാതെ സൂര്യനിൽനിന്നുള്ള പല വികിരണങ്ങളും മനുഷ്യർക്ക് ഏറെ ദോഷകരമാണ്. ഇത്തരത്തിലുള്ള പലതരം വികിരണങ്ങൾ ചേർന്നതാണ് സൂര്യപ്രകാശം. അവയിൽ തന്നെ പ്രധാനപ്പെട്ട ഒന്നാണ് ഇൻഫ്രാറെഡ് രശ്‌മി. സാധാരണ പ്രകാശത്തേക്കാൾ തരംഗദൈർഘ്യം കൂടുതലാണ് ഇൻഫ്രാറെഡ് രശ്‌മികൾക്ക്. നഗ്നനേത്രങ്ങൾ കൊണ്ട് ഇൻഫ്രാറെഡ് രശ്മികളെ കാണാൻ സാധിക്കില്ല. ഭൂമിയിലെ അന്തരീക്ഷത്തിലെ നീരാവി ഇൻഫ്രാറെഡ് തരംഗങ്ങളെ വലിയ രീതിയിൽ ആഗിരണം ചെയ്യും. അതിനാൽ ഭൂമിയിൽനിന്ന് ഇൻഫ്രാറെഡ് തരംഗങ്ങളെ വ്യക്തമായി നിരീക്ഷിക്കാൻ സാധ്യമല്ല. രാത്രികാലങ്ങളിൽ സൈനികർ ഉപയോഗിക്കുന്ന കണ്ണട, ടി.വി റിമോട്ട് എന്നിവയിൽ ഇൻഫ്രാറെഡ് രശ്‌മികളാണ് ഉപയോഗിക്കുന്നത്.
സൗരവികിരണത്തിൽ ദൃശ്യപ്രകാശം, അൾട്രാവയലറ്റ്, ഇൻഫ്രാറെഡ്, റേഡിയോ തരംഗങ്ങൾ, എക്സ്-റേ, ഗാമാ കിരണങ്ങൾ എന്നിവയെല്ലാമാണ് അടങ്ങിയിരിക്കുന്നത്. സൂര്യപ്രകാശത്തിൽ ഇരിക്കുന്ന ഇൻഫ്രാറെഡ്, അൾട്രാവയലറ്റ് തരംഗങ്ങൾ വൈദ്യുതകാന്തിക തരംഗങ്ങളാണ്. ഭൂമിയുടെ ഉപരിതലത്തെ ചൂടാക്കുന്നതിന് കാരണമാകുന്നത് ഈ ഇൻഫ്രാറെഡ് വികിരണങ്ങളാണ്.
സൂര്യൻ വളരെ വലിയ അളവിൽ തന്നെ വികിരണം പുറപ്പെടുവിക്കുന്നുണ്ട്. ഭൂമിയിൽ നിൽക്കുമ്പോൾ പോലും ഇവയിൽ പല വികിരണങ്ങളും നമുക്ക് ദോഷകരമായി മാറുന്നവയാണ്. സൂര്യനോട് അടുക്കുമ്പോൾ അപകടകരമായ തരത്തിൽ ഈ വികിരണം കൂടുതൽ തീവ്രമാകുന്നു. അതുകൊണ്ടുതന്നെ സൂര്യന് അടുത്തേക്ക് പോകുന്നത് മാത്രമല്ല സൂര്യനിൽ നിന്നുള്ള അപകടകരമായ വികിരണങ്ങൾ ഏൽക്കുന്നത് പോലും ജീവഹാനി വരുത്തുന്നതാണ്.
Discussion about this post