മുംബൈ : ബോളിവുഡ് താരം സൽമാൻ ഖാന്റെ പൻവേലിലുള്ള ഫാം ഹൗസിൽ അതിക്രമിച്ച് കയറാൻ ശ്രമിച്ച രണ്ട് പേർ അറസ്റ്റിൽ. രണ്ട് പ്രതികൾക്കെതിരെയും അതിക്രമിച്ച് കയറിയതിന് കേസെടുത്തതായി പോലീസ് അറിയിച്ചു. ഇരുവരും ഇതര സംസ്ഥാനക്കാരാണെന്നും സിനിമാ താരങ്ങളെ കാണാനാണ് മുംബൈയിൽ എത്തിയതെന്നുമാണ് പോലീസിന് മൊഴി നൽകിയിരിക്കുന്നത്.
സൽമാൻഖാന്റെ ഫാം ഹൗസിൽ അതിക്രമിച്ചു കയറാൻ നടന്ന ശ്രമത്തെ കുറിച്ച് വിശദമായ അന്വേഷണം നടത്തുമെന്ന് പോലീസ് വ്യക്തമാക്കി. പൻവേലിലെ ഫാം ഹൗസിന്റെ അതിർത്തിയിലുള്ള വേലിയോട് ചേർന്ന മരത്തിൽ കയറിയാണ് ഇവർ സൽമാൻഖാന്റെ ഉടമസ്ഥതയിലുള്ള അർപ്പിത ഫാം ഹൗസിലേക്ക് കടക്കാൻ ശ്രമിച്ചത്.
ലോറൻസ് ബിഷ്ണോയ് സംഘത്തിന്റെ വധഭീഷണി നിലനിൽക്കുന്നതിനാൽ നടൻ സൽമാൻഖാന്റെ സുരക്ഷ നേരത്തെ വർദ്ധിപ്പിച്ചിരുന്നു. ബിഷ്ണോയ് സമുദായം വിശുദ്ധ മൃഗമായി കരുതുന്ന കൃഷ്ണമൃഗത്തെ വേട്ടയാടിയതിന്റെ പേരിലാണ് ലോറൻസ് ബിഷ്ണോയ് സൽമാൻ ഖാനെ വധിക്കുമെന്ന് പ്രഖ്യാപിച്ചത്.
Discussion about this post