പോപ്പ് ഇതിഹാസം മൈക്കിൾ ജാക്സന്റെ ബയോപിക് ‘മൈക്കിൾ’ റിലീസിനൊരുങ്ങുന്നു. അടുത്ത വർഷം ഏപ്രിൽ 18ന് ചിത്രം തീയറ്ററുകളിലെത്തുമെന്നാണ് റിപ്പോർട്ടുകൾ. ഈ മാസം 22ന് ചിത്രീകരണം ആരംഭിക്കും.
അന്റോണിയോ ഫ്യൂകയാണ് ചിത്രം സംവിധാനം ചെയ്യുന്നത്. ജോണ് ലോഗന് രചന നിര്വഹിക്കുന്ന ചിത്രം നിര്മിക്കുന്നത് ഗ്രഹാം കിംഗാണ്. മൈക്കിൾ ജാക്സന്റെ മൂത്ത സഹോദരൻ ജര്മ്മൈന് ജാക്സന്റെ മകന് ജാഫർ ജാക്സനാണ് ചിത്രത്തിൽ പ്രധാന വേഷത്തിലെത്തുന്നത്. ചിത്രത്തിന്റെ പ്രധാന കഥാപാത്രത്തിലേക്ക് ആരെ തിരഞ്ഞെടുക്കുമെന്ന കാര്യത്തിൽ അണിയറ പ്രവർത്തകർക്കിടയിൽ നടന്ന നീണ്ട ചർച്ചകൾക്കൊടുവിലാണ് ജാഫറിലേക്ക് എത്തുന്നത്. മൈക്കിൾ ജാക്സന്റെ കുടുംബത്തിൽ നിന്നു തന്നെയുള്ള ഒരാൾ സിനിമയിൽ പ്രധാന കഥാപാത്രത്തിലേക്കെത്തുന്നതിൽ സന്തോഷമെന്ന് നിർമാതാവ് ഗ്രഹാം കിങ് പറയുന്നു. ജാഫർ കൃത്യമായി മൈക്കല് ജാക്സനെ പ്രതിഫലിപ്പിക്കുന്നതായി തോന്നിയെന്നാണ് അദ്ദേഹം പറയുന്നത്. മൈക്കിള് ജാക്സന്റെ ജീവിതത്തിന്റെ എല്ലാ വശവും ചര്ച്ചചെയ്യുന്ന ചിത്രത്തില് അദ്ദേഹത്തെ പോപ് ഇതിഹാസമാക്കിമാറ്റിയ ഗാനങ്ങളുടെ ജനപ്രിയ അവതരണങ്ങളും ഉണ്ടാകുമെന്ന് സംവിധായകൻ അന്റോയിന് ഫ്യൂകയും അറിയിച്ചിട്ടുണ്ട്.
പോപ് ലോകത്തെ മാന്ത്രികനായ മൈക്കിൾ ജാക്സന്റെ യഥാർത്ഥ ജീവിതം അതുപോലെ തന്നെ സിനിമയിലൂടെ പ്രേക്ഷകരിലേക്കെത്തുമെന്ന് ചിത്രത്തിന്റെ നിർമാതാക്കൾ പറയുന്നു. ലോകമെമ്പാടും ആരാധകരുള്ള ഇത്തരമൊരു താരത്തിന്റെ ജീവിതം സിനിമയാക്കുമ്പോള് അത് നൂറ് ശതമാനം നീതിപുലര്ത്തുന്നതാകുമെന്ന് അണിയറ പ്രവര്ത്തകര് വ്യക്തമാക്കുന്നു.
Discussion about this post