ഓപ്പൺഎഐ സിഇഒ സാം ആൾട്ട്മാനും പങ്കാളി ഒലിവർ മൽഹറിനും വിവാഹിതരായി. ആർട്ടിഫിഷ്യൽ ഇന്റലിജൻസ് മേഖലയിൽ ഏറെ തരംഗം സൃഷ്ടിച്ച ചാറ്റ്ജിപിടിയുടെ സൃഷ്ടാവാണ് സാം ആൾട്ട്മാൻ. അദ്ദേഹത്തിന്റെ ദീർഘകാലമായുള്ള സുഹൃത്തും പങ്കാളിയുമാണ് ഒലിവർ മൽഹറിൻ.
ഉടൻ വിവാഹിതരാകും എന്നും കുഞ്ഞുങ്ങളുമായി ഒരു കുടുംബജീവിതം നയിക്കാൻ താല്പര്യപ്പെടുന്നുണ്ടെന്നും ഏതാനും നാളുകൾക്കു മുൻപ് ന്യൂയോർക്ക് മാഗസിന് നൽകിയ ഒരു അഭിമുഖത്തിൽ സാം ആൾട്ട്മാൻ വ്യക്തമാക്കിയിരുന്നു. ഓസ്‌ട്രേലിയൻ സോഫ്‌റ്റ്‌വെയർ എഞ്ചിനീയറാണ് ആൾട്ട്മാന്റെ പങ്കാളിയായ ഒലിവർ മൽഹറിൻ.
ഹവായിലെ ഒരു സമുദ്രതീരത്ത് വെച്ച് ആയിരുന്നു വിവാഹ ചടങ്ങുകൾ നടന്നത്. വിവാഹവുമായി ബന്ധപ്പെട്ട് ഔദ്യോഗിക പ്രസ്താവനകൾ ഒന്നും പുറത്തിറങ്ങിയിട്ടില്ലെങ്കിലും ഇരുവരും വിവാഹമോതിരം കൈമാറുന്ന ചിത്രങ്ങൾ സമൂഹമാദ്ധ്യമങ്ങളിൽ ഇപ്പോൾ വ്യാപകമായി പ്രചരിക്കുകയാണ്. ഇരുവരുടെയും കുടുംബാംഗങ്ങളും അടുത്ത സുഹൃത്തുക്കളും മാത്രമാണ് വിവാഹ ചടങ്ങിൽ സന്നിഹിതരായിരുന്നത്.
