കോഴിക്കോട് : കേരളത്തിൽ ഒരിക്കൽ വനിതാ മുഖ്യമന്ത്രി ഉണ്ടാവുക തന്നെ ചെയ്യും എന്ന് സിപിഎം നേതാവും കേന്ദ്ര കമ്മിറ്റി അംഗവുമായ കെ കെ ശൈലജ. എന്നാൽ ഇപ്പോൾ കേരളത്തിൽ അതിന്റെ ആവശ്യമില്ലെന്നും കെ കെ ശൈലജ വ്യക്തമാക്കി. നിലവിലെ മുഖ്യമന്ത്രി വളരെ കാര്യക്ഷമമായാണ് കേരളത്തിൽ പ്രവർത്തിക്കുന്നത്. അതുകൊണ്ടുതന്നെ മുഖ്യമന്ത്രിയെ മാറ്റേണ്ട കാര്യം ഇപ്പോൾ ഇല്ലെന്നും ശൈലജ വ്യക്തമാക്കി.
ലോക്സഭ തെരഞ്ഞെടുപ്പിൽ സ്ത്രീകൾക്ക് കൂടുതൽ പ്രാതിനിധ്യം നൽകണമെന്നും കെ കെ ശൈലജ ആവശ്യപ്പെട്ടു. കോഴിക്കോട് നടന്ന കെഎൽഎഫ് വേദിയിൽ സംസാരിക്കുകയായിരുന്നു മുൻ മന്ത്രി കൂടിയായ കെ കെ ശൈലജ. നിയമസഭകളിലും സ്ത്രീകളുടെ അംഗസംഖ്യ ഉയരേണ്ടതാണ്. സ്ത്രീകൾക്ക് കൂടുതൽ പ്രാതിനിധ്യം കൊടുക്കണമെന്ന് ധാരണ എൽഡിഎഫിനു ഉണ്ട് എന്നും ശൈലജ വ്യക്തമാക്കി.
കേരളത്തിൽ ഇപ്പോഴുള്ളത് നവകേരള സൃഷ്ടിക്കായി പ്രവർത്തിക്കുന്ന മുഖ്യമന്ത്രിയാണ്. വളരെ കാര്യക്ഷമമായിട്ടാണ് ഇപ്പോഴത്തെ മുഖ്യമന്ത്രി പ്രവർത്തിക്കുന്നത്. കേരളത്തിലെ സർക്കാർ മാദ്ധ്യമങ്ങളെ വേട്ടയാടുന്നു എന്ന തരത്തിലുള്ള പ്രചാരണങ്ങൾ ശരിയല്ല. കോവിഡിന്റെയും നിപ്പയുടെയും കാലഘട്ടത്തിൽ മികച്ച സഹകരണമാണ് മാദ്ധ്യമങ്ങൾ നൽകിയത് എന്നും കെ കെ ശൈലജ സൂചിപ്പിച്ചു.
Discussion about this post