വയനാട് : ബസ് വൈദ്യുതി പോസ്റ്റിൽ ഇടിച്ച് അപകടം. വൈദ്യുതി പോസ്റ്റ് ബസ്സിലേക്ക് മറിഞ്ഞുവീണതോടെ ഷോക്കേറ്റ് ഡ്രൈവറും യാത്രക്കാരനും മരണപ്പെട്ടു. വയനാടിനോട് ചേർന്ന് കിടക്കുന്ന തമിഴ്നാട് പ്രദേശമായ പന്തല്ലൂരിലാണ് അപകടം ഉണ്ടായത്.
തമിഴ്നാട് ട്രാൻസ്പോർട്ട് കോർപ്പറേഷന്റെ ബസ്സാണ് അപകടത്തിൽപ്പെട്ടത്. എതിരെ വന്ന വാഹനത്തിന് സൈഡ് കൊടുക്കാൻ ശ്രമിക്കുമ്പോൾ ആയിരുന്നു വാഹനം വൈദ്യുതി പോസ്റ്റിൽ ഇടിച്ച് അപകടം സംഭവിച്ചത്. ബസ് ഡ്രൈവർ നാഗരാജ്, യാത്രക്കാരനായ പാൽരാജ് എന്നിവരാണ് ഷോക്കേറ്റ് മരണപ്പെട്ടത്.
വൈദ്യുതി ലൈനിൽ ഇടിച്ചതിനു പിന്നാലെ ഡ്രൈവറും യാത്രക്കാരനും പുറത്തിറങ്ങാൻ ശ്രമിച്ചപ്പോൾ ആയിരുന്നു ഇരുവർക്കും ഷോക്കേറ്റത്. തിങ്കളാഴ്ച രാത്രി 8 മണിയോടുകൂടിയായിരുന്നു അപകടം ഉണ്ടായത്. ഗൂഡല്ലൂരിൽ നിന്ന് അയ്യൻകൊല്ലിയിലേക്ക് വരികയായിരുന്ന ബസ്സാണ് അപകടത്തിൽപ്പെട്ടത്.
