കരിമ്പിൽ നിന്ന് നിർമ്മിക്കുന്ന ഉത്പന്നങ്ങളാണ് പഞ്ചസാരയും ശർക്കരയും. ശർക്കര പൂർണമായും പ്രകൃതിദത്ത രീതിയിലാണ് നിർമ്മിക്കുന്നത്. എന്നാൽ പഞ്ചസാരയാകട്ടെ ബ്ലീച്ചിംഗ് പ്രക്രിയയിലൂടെയും. പഞ്ചസാരയുടെ നിർമ്മാണത്തിന് ധാരാളം രാസവസ്തുക്കൾ ചേർക്കാറുണ്ട്. എന്നാൽ ശർക്കരയിലാകട്ടെ ഇത്രയധികം രാസവസ്തുക്കൾ ചേർക്കുന്നില്ല.
ഇരുമ്പ്, കാത്സ്യം, പൊട്ടാല്യം, ഫോസ്ഫറസ്, വിറ്റാമിൻ സി, കാത്സ്യം, സെലീനിയം എന്നിവ ശർക്കരയിൽ ധാരാളമായി കാണപ്പെടുന്നുണ്ടത്രേ. ശരീരത്തിലെ പോഷകക്കുറവ് നികത്താനും ദഹനവ്യവസ്ഥയെ ശക്തിപ്പെടുത്താനും രക്തസമ്മർദ്ദം നിയന്ത്രിക്കാനും ശർക്കര സഹായിക്കുന്നു. അനേകം ഗുണങ്ങൾക്കൂടി ശർക്കരയ്ക്ക് ഉണ്ട്. 20 ഗ്രാം ശർക്കരയിൽ 9.8 ഗ്രാം കാർബോഹൈഡ്രേറ്റ്, 9.7 ഗ്രാം പഞ്ചസാര, 0.01 ഗ്രാം പ്രോട്ടീൻ, കോളിൻ, ബെറ്റെയ്ൻ, വിറ്റാമിൻ ബി12, ഫോളേറ്റ്, കാൽസ്യം, അയൺ, ഫോസ്ഫറസ്, മഗ്നീഷ്യം എന്നിവയെല്ലാം അടങ്ങിയിരിക്കുന്നു.
ചർമ്മത്തിന്റെ തിളക്കം നിലനിർത്താൻ മാത്രമല്ല, മുഖക്കുരുപോലുള്ള ചർമ്മ പ്രശ്നങ്ങൾ ഒരു പരിധിവരെ നിയന്ത്രിച്ചു നിർത്താൻ ശർക്കര സഹായിക്കുന്നു. കൂടാതെ, ചർമ്മത്തിലെ ചുളിവുകൾ, കറുത്ത പാടുകൾ എന്നിവ ഇല്ലാതാക്കുന്നതിനും ശർക്കര സഹായിക്കുന്നു.
നിറം വച്ച് മായം ചേർക്കാത്ത ശർക്കരയെ തിരിച്ചറിയാൻ സാധിക്കും,സാധാരണയായി കടുംതവിട്ട് അല്ലെങ്കിൽ കറുപ്പ് നിറമുള്ള ശർക്കരയാണ് തിരഞ്ഞെടുക്കേണ്ടത്, ഇരുണ്ട നിറമുള്ള ശർക്കര രാസവസ്തുക്കൾ ചേർക്കാത്തതാണ്. കരിമ്പിന്റെ നീര് തിളപ്പിക്കുമ്പോൾ ശർക്കര ഉണ്ടാക്കാൻ ഉപയോഗിക്കുന്ന ഇരുണ്ട തവിട്ട് മിശ്രിതം അവശേഷിക്കാറുണ്ട്. ഈ മിശ്രിതത്തിൽ രാസവസ്തുക്കൾ ചേർത്ത് ശർക്കരയുടെ കടുംനിറം കുറയ്ക്കാറുണ്ട്. ഇത് കണ്ടുപിടിക്കാൻ ഒരു മാർഗമുണ്ട്. അര ടീസ്പൂൺ ശർക്കര എടുത്ത് അതിൽ ആറ് മില്ലി ആൽക്കഹോൾ ചേർത്ത് നന്നായി ഇളക്കുക, അതിന് ശേഷം 20 തുള്ളി ഹൈഡ്രോ ക്ലോറിക് ആസിഡ് ചേർക്കുക. ശർക്കര പിങ്ക് നിറത്തിലേക്ക് മാറിയാൽ അതിൽ കൃത്രിമ നിറങ്ങൾ ചേർത്തിട്ടുണ്ടെന്ന് മനസിലാക്കാം.
ശർക്കര വ്യാജമാണോ എന്നറിയാൻ, ഇത് രുചിച്ച് നോക്കുക. യഥാർത്ഥ ശർക്കരയ്ക്ക് കടുത്ത മധുരമാണ്. വ്യാജ ശർക്കരയ്ക്ക് നിറവ്യത്യാസവും കയ്പുരുചിയോ അല്ലെങ്കിൽ ഉപ്പുരുചിയോ ഉണ്ടാകും.
ഒരു ഗ്ലാസ് സുതാര്യമായ വെള്ളം എടുക്കുക. അതിലേക്ക് 10 ഗ്രാം സാമ്പിൾ ചേർക്കുക. ശർക്കരയിൽ ചോക്ക് കലർത്തിയിട്ടുണ്ടെങ്കിൽ വെളുത്ത പൊടി, ഗ്ലാസിനടിയിൽ അടിയുന്നത് കാണാം.
Discussion about this post