തിരുവനന്തപുരം: കേരള സർവകലാശാല സെനറ്റ് യോഗത്തിന് പോലീസ് സംരക്ഷണം വേണമെന്ന് വൈസ് ചാൻസലർ. സിറ്റി പോലീസ് കമ്മീഷണർക്ക് കത്ത് നൽകാൻ രജിസ്ട്രാർക്ക് നിർദേശം നൽകി. സെനറ്റ് അംഗങ്ങളെ തടയാൻ സാധ്യതയുണ്ടെന്ന പരാതിയെ തുടർന്നാണ് വിസിയുടെ നീക്കം.
ഗവർണറുടെ നോമിനികളായി തെരഞ്ഞെടുത്ത സെനറ്റ് അംഗങ്ങളെ കാലിക്കറ്റ് സർവകലാശാലയിൽ എസ്എഫ്ഐ തടഞ്ഞിരുന്നു. ഇത് മുന്നിൽ കണ്ടാണ് വിസി പോലീസ് സംരക്ഷണം ആവശ്യപ്പെട്ടതെന്നാണ് വിവരം. കാലിക്കറ്റ് സർവകലാശാലയിലെ സംഭവങ്ങൾ ആവർത്തിച്ചേക്കുമെന്നും പരാതിയിൽ പറയുന്നുണ്ട്.
ചാൻസിലറുടെ അന്ത്യശാസനത്തിന് പിന്നാലെയാണ് കേരളയിൽ യൂണിവേഴ്സിറ്റി പ്രതിനിധിയെ കണ്ടെത്താനുള്ള വൈസ് ചാൻസിലറുടെ നീക്കം. നോമിനിയെ നൽകുന്ന കാര്യം ചർച്ച ചെയ്യാൻ ഈ മാസം 16നാണ് പ്രത്യേക യോഗം വിളിച്ചത്.
