പാലക്കാട് : ക്ഷേമപെൻഷൻ ദീർഘനാളായി ലഭിക്കാത്തതിനെ തുടർന്ന് ജീവിതം വഴിമുട്ടിയ വൃദ്ധയായ അമ്മയും മകളും പ്രതിഷേധ സമരം നടത്തിയത് വലിയ വാർത്തയായിരുന്നു. ഇപ്പോഴിതാ ഈ വിഷയത്തിൽ ഇടപെട്ട് നടനും ബിജെപി നേതാവുമായ സുരേഷ് ഗോപി. സർക്കാർ എന്ന് പെൻഷൻ നൽകുന്നുവോ അതുവരെ പെൻഷൻ തുക സുരേഷ് ഗോപി നൽകുമെന്നാണ് അറിയിച്ചിട്ടുള്ളത്.
പാലക്കാട് അകത്തേത്തറ പഞ്ചായത്ത് ഓഫീസിന് മുൻപിൽ ആയിരുന്നു 92 വയസ്സുകാരിയായ പത്മാവതി അമ്മയും അവരുടെ 67 വയസ്സുകാരിയായ മകൾ ഇന്ദിരയും പ്രതിഷേധ സമരം നടത്തിയിരുന്നത്. പെൻഷനായി ലഭിച്ചിരുന്ന തുക കൊണ്ടാണ് ജീവിതം കഴിഞ്ഞ് പോകുന്നത്. എന്നാൽ ആറുമാസത്തോളമായി ഇരുവർക്കും പെൻഷൻ ലഭിച്ചിട്ടില്ല. ജീവിതം പ്രതിസന്ധിയിൽ ആയ അവസ്ഥയാണുള്ളത്. ഇതോടെയാണ് വൃദ്ധയായ അമ്മയും മകളും പഞ്ചായത്ത് ഓഫീസിനു മുൻപിൽ പ്രതിഷേധ സമരവുമായി എത്തിയത്.
സംഭവം വാർത്തയായതോടെയാണ് സുരേഷ് ഗോപി ഇവരെ കുറിച്ച് അറിയുന്നത്. ഉടൻ തന്നെ സുരേഷ് ഗോപി ഈ വിഷയത്തിൽ ഇടപെടുകയായിരുന്നു. മുൻ എംപി എന്ന നിലയിൽ തനിക്ക് ലഭിക്കുന്ന പെൻഷനിൽ നിന്നും ഈ വൃദ്ധയായ അമ്മയുടെയും മകളുടെയും പെൻഷൻ നൽകുമെന്നാണ് വ്യക്തമാക്കിയിട്ടുള്ളത്. സർക്കാർ എന്ന് പെൻഷൻ തുക നൽകുന്നുവോ അതുവരെ താൻ പെൻഷൻ നൽകാമെന്നും സമരം അവസാനിപ്പിച്ച് വീട്ടിലേക്ക് മടങ്ങണമെന്നും അദ്ദേഹം പത്മാവതി അമ്മയോടും മകളോടും അപേക്ഷിച്ചു.
Discussion about this post