തിരുവനന്തപുരം : പിണറായി വിജയൻ ‘നാറി’ ആണെന്ന് കെപിസിസി അധ്യക്ഷൻ കെ സുധാകരൻ എം പി. പിണറായി വിജയന് പണം മാത്രമാണ് ഒരേ ഒരു ലക്ഷ്യം. അഴിമതിപ്പണം കൊണ്ട് കുടുംബത്തെ പോറ്റുന്നവനാണ് പിണറായിയെന്നും കെ സുധാകരൻ ആക്ഷേപിച്ചു. നാട്ടിൽ ഒരു സർക്കാരില്ലാത്ത അവസ്ഥയാണ് ഇപ്പോൾ ഉള്ളതെന്നും കെ സുധാകരൻ വ്യക്തമാക്കി.
പിണറായി വിജയന് താങ്ങും തണലുമായി നിൽക്കുന്നത് ബിജെപി ആണെന്നും കെ സുധാകരൻ അഭിപ്രായപ്പെട്ടു. നരേന്ദ്രമോദി പറഞ്ഞ രണ്ടക്ക സീറ്റ് പിണറായി വിജയനുമായുള്ള അഡ്ജസ്റ്റ്മെന്റ് ആണെന്നും അദ്ദേഹം വിമർശിച്ചു. കഴിഞ്ഞദിവസം ആലപ്പുഴയിൽ വെച്ച് കെപിസിസിയുടെ സമരാഗ്നി ജാഥയുമായി ബന്ധപ്പെട്ട വാർത്ത സമ്മേളനത്തിനിടയിൽ കെ സുധാകരൻ വി ഡി സതീശനെതിരെ അസഭ്യ പരാമർശം നടത്തിയത് വിവാദമായിരുന്നു. ഇതിനു പിന്നാലെയാണ് ഇപ്പോൾ കെ സുധാകരൻ മുഖ്യമന്ത്രി പിണറായി വിജയനെ നാറി എന്ന് വിളിച്ചിരിക്കുന്നത്.
സിഎംആർഎൽ കമ്പനിയിൽനിന്ന് നൂറു കോടിയോളം രൂപ മുഖ്യമന്ത്രി പിണറായി വിജയൻ കൈപ്പറ്റിയെന്ന മാത്യു കുഴൽനാടൻ എംഎൽഎയുടെ ആരോപണത്തിൽ സിബിഐ അന്വേഷണം നടത്തണമെന്നും കെ സുധാകരൻ ആവശ്യപ്പെട്ടു. കേരളത്തിലെ രണ്ടു പ്രമാദമായ അഴിമതികളിലും പിണറായി വിജയന്റെ പേര് ഉയർന്നുവരികയാണെന്നും കെ സുധാകരൻ കുറ്റപ്പെടുത്തി.
Discussion about this post