ഹിന്ദുക്കളുടെ ഏറ്റവും മഹത്തായ ആഘോഷങ്ങളിൽ ഒന്നാണ് മഹാ ശിവരാത്രി. ഈ ദിവസത്തിന് ഹിന്ദുമതത്തിൽ ആത്മീയവും മതപരവുമായ പ്രാധാന്യമുണ്ട്. എല്ലാ ചാന്ദ്ര-സൗര മാസത്തിലും അമാവാസിയുടെ തലേദിവസം ഒരു ശിവരാത്രിയുണ്ട്. എന്നിരുന്നാലും, മഹാശിവരാത്രി അഥവാ പത്മരാജരാത്രി അല്ലെങ്കിൽ ‘ശിവൻ്റെ മഹത്തായ രാത്രി’ എന്നറിയപ്പെടുന്ന രാത്രി ഫാൽഗുനി അല്ലെങ്കിൽ മാഘ മാസത്തിലെ ചതുർദശി തിഥി കൃഷ്ണ പക്ഷത്തിലാണ് വരുന്നത്, . ഈ ദിവസമാണ് ശിവൻ പാർവതിയെ വിവാഹം കഴിച്ചതെന്നാണ് വിശ്വാസം.
ഭാരതത്തിൽ അങ്ങോളമിങ്ങോളം ഓരോ കോണുകളിലും ശിവ രാത്രി ആഘോഷിക്കപ്പെടുന്നു. ശിവ രാത്രി എന്ന് കേൾക്കുമ്പോൾ തന്നെ നമുക്ക് വരാണസിയും രാമേശ്വരവും സോമനാഥ ക്ഷേത്രവും കൈലാസവും ഒക്കെയാണ് ഓർമ്മ വരുക. എന്നാൽ അങ്ങനെയുള്ള ഇന്ത്യയിൽ മഹാ ശിവരാത്രി ഒരു ദേശീയ അവധി ദിനം അല്ല എന്ന് പറഞ്ഞാൽ വിശ്വസിക്കാൻ പറ്റുമോ? എന്നാൽ അങ്ങനെയാണ്. ഇന്ത്യയിൽ ദേശീയ അവധിയില്ല എന്ന് മാത്രമല്ല മറ്റൊരു രാജ്യത്ത് മഹാ ശിവരാത്രി ദേശീയ അവധി ദിനവുമാണ് എന്നതാണ് അതിന്റെ രസകരമായ കാര്യം. ഇന്ത്യയിൽ വേണമെങ്കിൽ എടുക്കാവുന്ന അവധികളുടെ കൂട്ടത്തിലാണ് മഹാശിവരാത്രി വരുന്നത്.
എന്നാൽ, പൗരാണിക ഭാരതത്തിലെ 52 ശക്തിപീഠങ്ങളിൽ ഒന്നായ പശുപതി നാഥ ക്ഷേത്രം സ്ഥിതി ചെയ്യുന്ന നേപ്പാളാണ് “മഹാ ശിവരാത്രി” ദേശീയ അവധിയായി പ്രഖ്യാപിച്ചിട്ടുള്ള രാജ്യം. ലോകത്തിലെ ഒരേയൊരു ഹിന്ദു രാജ്യം ആയിരുന്ന നേപ്പാൾ എന്നാൽ അല്പകാലം മുമ്പ് ആ വിശേഷണം ഔദ്യോഗികമായി എടുത്തു കളഞ്ഞിരുന്നു.
എന്നിരുന്നാലും ഇപ്പോഴും നേപ്പാളിലെ ഒരു പ്രധാന ആഘോഷമാണ് മഹാ ശിവരാത്രി. ഈ ദിവസം ദേശീയ അവധി ദിവസമാണ് , ആളുകൾ രാജ്യത്തുടനീളമുള്ള ക്ഷേത്രങ്ങളിൽ മഹാശിവരാത്രി വലിയ ആവേശത്തോടെ ആഘോഷിക്കുന്നു. അന്നേ ദിവസം ആയിരക്കണക്കിന് ശിവ അനുയായികൾ നേപ്പാളിൽ നിന്നും ഇന്ത്യയിൽ നിന്നും പരമശിവൻ്റെ പരമമായ വാസസ്ഥലമായ പശുപതിനാഥ് സന്ദർശിക്കുന്നു. ശിവൻ ഒരു മാനിന്റെ രൂപത്തിൽ പശുപതി നാഥ് സന്ദർശിച്ചു എന്നാണ് ഐതീഹ്യം.ദേവിയുടെ 52 ശക്തിപീഠങ്ങളിൽ ഒന്നാണ് പശുപതിനാഥ ക്ഷേത്രം എന്നതാണ് ഈ സ്ഥലം ശിവൻ്റെ അനുയായികൾക്ക് ഇവിടം കൂടുതൽ പ്രാധാന്യമുള്ളതാക്കുന്നത്.
