ശബരിമല: മകരസംക്രമ പൂജയ്ക്ക് ശേഷം പാവനമായ മകരജ്യോതി കാണാനുള്ള കാത്തിരിപ്പിലാണ് ലക്ഷകണക്കിന് അയ്യപ്പ ഭക്തര്‍. പൊന്നമ്പലമേട്ടിലിന്നാണ് മകരജ്യോതി തെളിയുന്നത്.പുണ്യദര്‍ശനം കാത്ത് ഭക്തലക്ഷങ്ങളാണ് സന്നിധാനത്തും പരിസരത്തും തമ്പടിച്ചിരിക്കുന്നത്.
സൂര്യന്‍ ധനു രാശിയില്‍ നിന്നു മകരം രാശിയിലേക്കു കടന്ന മുഹൂര്‍ത്തത്തില്‍ ഇന്നു പുലര്‍ച്ചെ 1.29നായിരുന്നു മകരസംക്രമപൂജ. ഇന്നു മകരസംക്രമ സന്ധ്യയില്‍ അയ്യപ്പനു തിരുവാഭരണങ്ങളണിഞ്ഞ് ദീപാരാധന നടത്തും. അപ്പോള്‍ ആകാശത്തു മകരസംക്രമ നക്ഷത്രമുദിക്കും. ഈ സമയം പൊന്നമ്പലമേട്ടില്‍ മകരജ്യോതി തെളിയും. ശരണമന്ത്രംകൊണ്ട് പൂങ്കാവനം ഭക്തിസാന്ദ്രമാകും
പാണ്ടിത്താവളത്തിലെ പര്‍ണശാലകളിലും സന്നിധാനത്തെ വിശ്രമപ്പന്തലുകളിലും കൊപ്രാക്കളത്തിനു സമീപത്തെ തുറസായ സ്ഥലത്തും മകരജ്യോതി കാണാന്‍ കഴിയുന്ന എല്ലായിടങ്ങളിലും ഭക്തര്‍ വിരിവച്ച് കാത്തിരിക്കുകയാണ്. പന്തളത്തു നിന്ന് തിരുവാഭരണങ്ങളുമായി ബുധനാഴ്ച പുറപ്പെട്ട ഘോഷയാത്ര ഇന്നു വൈകിട്ട് അഞ്ചിന് ശരംകുത്തിയിലെത്തും. അവിടെയും സന്നിധാനത്ത് കൊടിമരച്ചുവട്ടിലും സ്വീകരണത്തിനു ശേഷം സോപാനത്തെത്തിക്കുന്ന തിരുവാഭരണങ്ങള്‍ തന്ത്രി കണ്ഠര് മഹേഷ് മോഹനരും മേല്‍ശാന്തി എസ്.ഇ. ശങ്കരന്‍ നമ്പൂതിരിയും ഏറ്റുവാങ്ങി അയ്യപ്പവിഗ്രഹത്തില്‍ ചാര്‍ത്തും.
6.30ന് ദീപാരാധനയ്‌ക്കൊപ്പം മകരജ്യോതി തെളിയുന്ന പുണ്യമുഹൂര്‍ത്തമെത്തും. 19 വരെ മാത്രമേ നെയ്യഭിഷേകം ഉണ്ടാകൂ. 20വരെ ഭക്തര്‍ക്ക് ദര്‍ശനസൗകര്യം ഉണ്ടാകും. 21 രാവിലെ പന്തളരാജാവിന്റെ ദര്‍ശനത്തിനുശേഷം നട അടയ്ക്കുന്നതോടെ മകരവിളക്ക് തീര്‍ഥാടനത്തിന് സമാപനമാകും.
Discussion about this post