മമ്മൂട്ടി നായകനായി എത്തിയ ഏറ്റവും പുതിയ ചിത്രം ഭ്രമയുഗം ഒടിടിയിലേക്ക്. ചിത്രത്തിന്റെ ഒടിടി റിലീസ് തീയതി പ്രഖ്യാപിച്ചു. സോണി ലിവ് ആണ് ഭ്രമയുഗം ഒടിടിയിലേക്ക് എത്തിക്കുന്നത്. മാർച്ച് 15നാണ് ചിത്രം സോണി ലിവിൽ സ്ട്രീമിംഗ് ആരംഭിക്കുന്നത്.
ഇപ്പോഴും കേരളത്തിലെ വിവിധ തീയേറ്ററുകളിൽ ഭ്രമയുഗത്തിന്റെ പ്രദർശനം നടക്കുന്നുണ്ട്. ഫെബ്രുവരി 15ന് ആയിരുന്നു ചിത്രം തിയറ്ററുകളിൽ റിലീസ് ചെയ്തിരുന്നത്. ഭൂതകാലം എന്ന ചിത്രത്തിനുശേഷം രാഹുൽ സദാശിവൻ സംവിധാനം ചെയ്ത ഹൊറർ പശ്ചാത്തലത്തിലുള്ള ചിത്രമാണ് ഭ്രമയുഗം.
ബ്ലാക്ക് ആൻഡ് വൈറ്റ് പശ്ചാത്തലത്തിലാണ് ഈ ചിത്രം ഒരുക്കിയത് എന്നുള്ളതായിരുന്നു ഏറ്റവും വലിയ പ്രത്യേകത. കൊടുമൺ പോറ്റി എന്ന കഥാപാത്രത്തെ ആയിരുന്നു ചിത്രത്തിൽ മമ്മൂട്ടി അവതരിപ്പിച്ചിരുന്നത്. അർജുൻ അശോകൻ, സിദ്ധാർത്ഥ് ഭരതൻ, അമൽഡ ലിസ് എന്നിവരായിരുന്നു ചിത്രത്തിലെ മറ്റു കഥാപാത്രങ്ങളെ അവതരിപ്പിച്ചിരുന്നത്.
