ന്യൂഡൽഹി: പൗരത്വ നിയമ ഭേദദഗതിയ്ക്കെതിരെ സുപ്രീംകോടതിയെ സമീപിച്ച് എഐഎംഐഎം നേതാവ് അസദുദ്ദീൻ ഒവൈസി. രാവിലെയോടെയാണ് അദ്ദേഹം അഭിഭാഷകൻ മുഖേന കോടതിയിൽ ഹർജി നൽകിയത്. പൗരത്വ നിയമ ഭേദഗതി നിയമം നടപ്പിലാക്കാനുള്ള സർക്കാർ നീക്കം തടയണം എന്നാണ് ഹർജിയിലെ ആവശ്യം.
പൗരത്വം ആവശ്യമുള്ളവർക്ക് അപേക്ഷ നൽകുന്നതിനായുള്ള വെബ്സൈറ്റും ആപ്പും കഴിഞ്ഞ ദിവസം കേന്ദ്രസർക്കാർ സജ്ജമാക്കിയിരുന്നു. ഇതിന് പിന്നാലെയാണ് ഒവൈസി കോടതിയെ സമീപിച്ചത്. 1955 ലെ പൗരത്വ നിയമത്തിന്റെ ആറ് ബി വകുപ്പ് പ്രകാരം സർക്കാരിന്റെ നീക്കങ്ങൾ ചട്ടവിരുദ്ധമാണെന്നാണ് ഒവൈസി ഹർജിയിൽ പറയുന്നത്. അതിനാൽ കോടതി ഇടപെട്ട് സർക്കാരിന്റെ നീക്കങ്ങൾ തടയണമെന്നും ഹർജിയിൽ ആവശ്യപ്പെടുന്നു.
പൗരത്വ ഭേദഗതി നിയമത്തെ പിന്തുണച്ച് നിരവധി മുസ്ലീങ്ങളും ഇസ്ലാമിക സംഘടനകളും രംഗത്ത് വന്നിട്ടുണ്ട്. ഇതിനിടെയാണ് ഒവൈസി ഹർജി നൽകിയിരിക്കുന്നത്. ലോക്സഭാ തിരഞ്ഞെടുപ്പ് അടുത്തിരിക്കെ ഒവൈസിയുടെ ഹർജി രാഷ്ട്രീയ പ്രേരിതം ആണെന്നാണ് ആക്ഷേപം.
Discussion about this post