കോഴിക്കോട് : കോഴിക്കോട് തെരുവ് നായയെ ചത്ത നിലയിൽ കണ്ടെത്തിയ സംഭവത്തിൽ പരിശോധന റിപ്പോർട്ട് പുറത്ത്. നായക്ക് പേവിഷബാധ ഉണ്ടായിരുന്നതായി സ്ഥിരീകരിച്ചു. കോഴിക്കോട് കാരശ്ശേരി പഞ്ചായത്തിലാണ് കഴിഞ്ഞദിവസം തെരുവ് നായയെ ചത്ത നിലയിൽ കണ്ടെത്തിയത്.
പ്രദേശത്ത് പരാക്രമം നടത്തിയതിനെ തുടർന്ന് നാട്ടുകാർ നായയെ പിടികൂടാനായി തിരച്ചിൽ നടത്തിയിരുന്നു. ഇതിനിടയിലാണ് നായയെ ചത്ത നിലയിൽ കണ്ടെത്തിയത്. ഈ നായ നെല്ലിക്കാപറമ്പ് ഭാഗത്ത് വെച്ച് ഒരു കുട്ടിയെയും നിരവധി വളർത്തു മൃഗങ്ങളെയും കടിച്ചിരുന്നു.
ചത്ത നിലയിൽ കണ്ടെത്തിയതിനെ തുടർന്ന് നായയുടെ ശരീരം പൂക്കോട് വെറ്റിനറി മെഡിക്കൽ കോളേജിൽ സ്രവപരിശോധന നടത്തി. ഈ പരിശോധനയിലാണ് നായക്ക് പേവിഷബാധ ഉണ്ടായിരുന്നതായി സ്ഥിരീകരിച്ചത്. നായയുടെ കടിയേറ്റവർ ആരോഗ്യവകുപ്പിന്റെ സഹായം തേടണം എന്നും കടിയേറ്റ വളർത്തുമൃഗങ്ങളുമായി സമ്പർക്കം ഒഴിവാക്കണമെന്നും അധികൃതർ നിർദ്ദേശം നൽകിയിട്ടുണ്ട്.
Discussion about this post