ഐപിഎൽ: ജയത്തോടെ സീസൺ തുടങ്ങി ചെന്നൈ

ഐപിഎല്ലിലെ ഈ സീസണിലെ ആദ്യ മത്സരം ജയത്തോടെ തുടങ്ങി ചെന്നൈ സൂപ്പർ കിംഗ്‌സ്. പതിനേഴാം സീസണിലെ ആദ്യ മത്സരത്തിൽ റോയൽ ചലഞ്ചേഴ്‌സ് ബംഗളൂരുവിനെ 6 വിക്കറ്റിനാണ് ചെന്നൈ സൂപ്പർ കിംഗ്‌സ് തോൽപ്പിച്ചത്. റോയൽ ചലഞ്ചേഴ്‌സ് ബംഗളൂരു ഉയർത്തിയ 174 റൺസ് വിജയലക്ഷ്യം 8 പന്ത് അവശേഷിക്കെയാണ് ചെന്നൈ മറികടന്നത്.

എം എസ് ധോണിയിൽ നിന്ന് ചെന്നൈയുടെ ക്യാപ്റ്റൻ സ്ഥാനം ഏറ്റെടുത്ത ഋതുരാജ് ഗെയ്ക് വാദിന് ജയത്തോടെ തന്നെ തുടങ്ങാനായി. 15 പന്തിൽ നിന്ന് മൂന്ന് സിക്‌സും മൂന്ന് ഫോറുമായി 37 റൺസെടുത്ത ന്യൂസിലൻഡ് താരം രചിൻ രവീന്ദ്രയാണ് ചെന്നൈ സൂപ്പർ കിംഗ്‌സിന്റെ ടോപ്പ് സ്‌കോറർ. ക്യാപ്റ്റൻ ഋതുരാജ് 15 പന്തിൽ നിന്ന് 15 റൺസ് നേടിയാണ് മടങ്ങിയത്.

ചെന്നൈയുടെ വിജയത്തിൽ 28 പന്തിൽ നിന്ന് 34 റൺസ് നേടിയ ശിവം ദുബെയും 17 പന്തിൽ നിന്ന് 25 റൺസ് സ്വന്തമാക്കിയ രവീന്ദ്ര ജഡേജയും നിർണായക പങ്കുവഹിച്ചു.

നിശ്ചിത 20 ഓവറിൽ 6 വിക്കറ്റ് നഷ്ടത്തിലാണ് റോയൽ ചലഞ്ചേഴ്‌സ് ബംഗളൂരു 173 റൺസ് അടിച്ചെടുത്തത്. 25 പന്തിൽ നിന്ന് 48 റൺസ് സ്വന്തമാക്കിയ അനൂജ് റാവത്താണ് ബംഗളൂരുവിന്റെ ടോപ്പ് സ്‌കോറർ. ഓപ്പണർമാരായ ഹാഫ് ഡുപ്ലെസി 35 റൺസും വിരാട് കോഹ്ലി 21 റൺസും നേടി ആർ സി ബിക്ക് മികച്ച തുടക്കം സമ്മാനിച്ചു. നാല് വിക്കറ്റ് വീഴ്ത്തിയ മുസ്തഫിസൂർ റഹ്‌മാൻ ചെന്നൈ ബൗളിംഗ് നിരയിൽ തിളങ്ങി.