കൊല്ലം: തിരഞ്ഞെടുപ്പ് പ്രചാരണത്തിനെത്തിയ എൻഡിഎ സ്ഥാനാർത്ഥി ജി കൃഷ്ണകുമാറിനെ അപായപ്പെടുത്താൻ ശ്രമിച്ച സംഭവത്തിൽ എസ്എഫ്ഐക്കാർക്കെതിരെ കേസ് എടുത്ത് പോലീസ്. ചന്ദനത്തോപ്പ് ഐടിഐയിലെ എസ്എഫ്ഐക്കാർക്കെതിരെയാണ് കേസ് എടുത്തത്. എബിവിപിയും, എൻഡിഎയും നൽകിയ പരാതിയിലാണ് പോലീസ് നടപടി.
ഇന്നലെയാണ് കൃഷ്ണകുമാറും പ്രവർത്തകരും ഐടിഐയിൽ എത്തിയത്. തിരഞ്ഞെടുപ്പിന്റെ ഭാഗമായി ഇന്നലെ ക്യാമ്പസിൽ എബിവിപിയുടെ നേതൃത്വത്തിൽ കായിക മേള സംഘടിപ്പിച്ചിരുന്നു. ഇതിന്റെ സമ്മാനദാനം കൃഷ്ണകുമാറിനെ കൊണ്ട് നടപ്പിലാക്കാൻ എബിവിപി പ്രവർത്തകർ ശ്രമിച്ചു. എന്നാൽ എസ്എഫ്ഐ ഗുണ്ടകൾ ഇത് തടയുകയായിരുന്നു. തുടർന്ന് അദ്ദേഹത്തെ കയ്യേറ്റം ചെയ്യാനും ശ്രമമുണ്ടായി. ഇതോടെ എബിവിപി പ്രവർത്തകർ പ്രതിരോധിക്കാനെത്തി. ഇവരെയും എസ്എഫ്ഐക്കാർ ആയുധങ്ങൾ ഉപയോഗിച്ച് ആക്രമിച്ചു.
സംഭവത്തിൽ എബിവിപി പ്രവർത്തകർ ഉൾപ്പെടെ നിരവധി പേർക്ക് പരിക്കേറ്റിരുന്നു. ഇതിന് പിന്നാലെ പോലീസിൽ പരാതിപ്പെടുകയായിരുന്നു. എൻഡിഎ മണ്ഡലം കമ്മിറ്റിയും എബിവിപി യൂണിറ്റുമാണ് പരാതി നൽകിയത്. അന്യായമായി സംഘം ചേരൽ, ആയുധം കൊണ്ട് ആക്രമിക്കൽ, മുറിവേൽപ്പിക്കൽ എന്നിവ അടക്കമുള്ള കുറ്റങ്ങൾ ചുമത്തിയാണ് കേസ് എടുത്തത്.
Discussion about this post