ആലപ്പുഴ: മന്ത്രി സജി ചെറിന്റെ കാർ അപകടത്തിൽപ്പെട്ടു. ആലപ്പുഴയിലെ കായംകുളത്തു വച്ചായിരുന്നു വാഹനാപകടം ഉണ്ടായത്. ഫേസ്ബുക്കിലൂടെ മന്ത്രി തന്നെയാണ് ഇക്കാര്യം അറിയിച്ചത്. അപകടത്തിൽ ആർക്കും പരിക്കില്ലെന്നും എല്ലാവരും സുരക്ഷിതരാണെന്നും സജി ചെറിയാൻ അറിയിച്ചു.
എതിരെ വന്ന കാറുമായി അദ്ദേഹം സഞ്ചരിച്ച വാഹനം കൂട്ടിയിടിയ്ക്കുകയായിരുന്നു. ഇതേ തുടർന്ന് സജി ചെറിയാന്റെ കാറിന് പുറകേ വരികയായിരുന്ന മറ്റൊരു കാർ സംഭവ സമയം അതുവഴി വന്ന ടിപ്പർ ലോറിയുമായും കൂട്ടിയിടിച്ചു. അപകടത്തിൽ മൂന്ന് കാറുകൾക്കും കേടുപാടുകൾ ഉണ്ടായി.
വാഹനാപകടത്തിന്റെ വാർത്തകൾ പുറത്തുവന്നതിന് പിന്നാലെ നിരവധി പേർ അദ്ദേഹത്തെ ഫോണിൽ വിളിച്ച് വിവരങ്ങൾ ആരാഞ്ഞിരുന്നു. ഇതേ തുടർന്നായിരുന്നു അദ്ദേഹം ഫേസ്ബുക്ക് പോസ്റ്റിട്ടത്.
ഫേസ്ബുക്ക് പോസ്റ്റിന്റെ പൂർണരൂപം
ഞാൻ സഞ്ചരിച്ച കാർ കായംകുളത്ത് വെച്ച് അപകടത്തിൽ പെട്ട വാർത്തയെത്തുടർന്ന് ഒട്ടേറെ പേരാണ് വിളിച്ചു തിരക്കുന്നത്. അപകടത്തിൽ ഞാനുൾപ്പെടെ വാഹനങ്ങളിലുണ്ടായിരുന്ന ആർക്കും സാരമായ പരിക്കില്ല. ഏവരുടെയും സ്‌നേഹത്തിനും കരുതലിനും നന്ദി.
Discussion about this post