ന്യൂഡൽഹി: തിരഞ്ഞെടുപ്പ് പ്രചാരണത്തിൽ നിന്ന് പിൻമാറുന്നതായി ബിജെപി നേതാവും നടിയുമായ ഖുശ്ബു. ആരോഗ്യകാരണങ്ങളാൽ ആണ് തീരുമാനം എന്ന് ബിജെപി അധ്യക്ഷൻ ജെ. പി. നദ്ദക്ക് അയച്ച കത്തിൽ ഖുശ്ബു അറിയിച്ചു. ഡോക്ടർമാരുടെ നിർദേശപ്രകാരം ആണ് പിന്മാറ്റം എന്നും മോദിയുടെ സത്യപ്രതിജ്ഞയ്ക്ക് കാണമെന്നും ഖുശ്ബു പറഞ്ഞു. ഈ മാസം പത്തിന് ശേഷം സുരേഷ് ഗോപിയുടെ പ്രചാരണത്തിനായി തൃശൂരിൽ എത്തുമെന്ന് ഖുശ്ബു പറഞ്ഞിരുന്നു.
2019ൽ ഡൽഹിയിൽ വെച്ചുണ്ടായ ഒരു അപകടത്തിൽ ഖുശ്ബുവിന്റെ നട്ടെല്ലിന് ഗുരുതരമായി പരിക്കേറ്റിരുന്നു. അഞ്ചുവർഷമായി അതിന്റെ ചികിത്സകൾ തുടരുകയായിരുന്നു. എന്നാൽ, അടുത്തിടെ വേദന കൂടി. ഈ സാഹചര്യത്തിലാണ് ആരോഗ്യവിദഗ്ധരുടെ ഉപദേശമനുസരിച്ച് വിശ്രമിക്കാൻ തീരുമാനിച്ചതെന്നാണ് ഖുശ്ബു കത്തിൽ പറയുന്നത്.
ഗുരുതരമായ ആരോഗ്യപ്രശ്നത്തിലൂടെയാണ് കടന്നുപോകുന്നത്. അതുകൊണ്ടുതന്നെ ഈ വർഷത്തെ പ്രചാരണ പ്രവർത്തനങ്ങളിൽനിന്ന് മാറിനിൽക്കാനുള്ള അനുമതി നൽകണമെന്നാണ് ഖുശ്ബു നഡ്ഡയ്ക്ക് എഴുതിയ കത്തിൽ വ്യക്തമാക്കുന്നത്. നരേന്ദ്രമോദി മൂന്നാം തവണയും പ്രധാനമന്ത്രി സ്ഥാനത്തേക്ക് തിരഞ്ഞെടുക്കപ്പെടുമ്പോൾ സത്യാപ്രതിജ്ഞാ ചടങ്ങിൽ പങ്കെടുക്കാനായി താൻ ഡൽഹിയിൽ എത്തുമെന്ന ശുഭപ്രതീക്ഷയും ഖുശ്ബു നദ്ദയ്ക്കയച്ച കത്തിൽ പങ്കുവെച്ചിട്ടുണ്ട്.
