ന്യൂഡൽഹി; മദ്യനയ അഴിമതിക്കേസിൽ അറസ്റ്റിലായ ഡൽഹി മുഖ്യമന്ത്രി അരവിന്ദ് കെജ്രിവാളിന് ഇന്ന് നിർണായക ദിനം. അറസ്റ്റ് ചോദ്യം ചെയ്തുള്ള അരവിന്ദ് കെജ്രിവാളിൻറെ ഹർജിയിൽ ഡൽഹി ഹൈക്കോടതി ഇന്ന് വിധി പറയും. ജസ്റ്റിസ് സ്വരണ കാന്ത ശർമ്മ ഉച്ചയ്ക്ക് 2.30-ന് ആകും ഉത്തരവ് പുറപ്പെടുവിക്കുക.
ഈ മാസം മൂന്നാം തീയതിയാണ് ഹർജി വിധി പറയാൻ മാറ്റിയത്. നാല് മണിക്കൂർ നീണ്ട വാദത്തിനൊടുവിലാണ് ജസ്റ്റിസ് സ്വർണകാന്ത ശർമ കേസ് വിധി പറയുന്നതിനായി മാറ്റിയത്. കെജ്രിവാളിന് വേണ്ടി മുതിർന്ന അഭിഭാഷകരായ അഭിഷേക് മനു സിങ്വിയും വിക്രം ചൗധരിയും ഇഡിക്ക് വേണ്ടി വേണ്ടി അഡീഷണൽ സോളിസിറ്റർ ജനറൽ എസ്വി രാജുവും ഹാജരായി.
അറസ്റ്റിന് പുറമെ, എൻഫോഴ്സ്മെൻറ് ഡയറക്ടറേറ്റിൻറെ കസ്റ്റഡിയെയും കെജ്രിവാൾ ചോദ്യം ചെയ്തിട്ടുണ്ട്. കേസിൽ ജുഡീഷ്യൽ കസ്റ്റഡിയിൽ റിമാൻഡ് ചെയ്യപ്പെട്ട കെജ്രിവാൾ ഇപ്പോൾ തിഹാർ ജയിലിലാണ്. അതേ സമയം, കെജ്രിവാളിനും ആം ആദ്മിക്കും നിയമം ഒരുപോലെ ബാധകമാണെന്നും അതിനാൽ തെരഞ്ഞെടുപ്പിൻറെ പേരിൽ അറസ്റ്റിൽ നിന്ന് ഒഴിവാകാനാകില്ലെന്നുമാണ് ഇഡിയുടെ വാദം. മാർച്ച് 21 ന് ആണ് ഡൽഹി മദ്യനയ കേസിൽ കെജ്രിവാളിനെ ഇഡി അറസ്റ്റ് ചെയ്യുന്നത്. കസ്റ്റഡി കാലാവധി അവസാനിച്ച ഏപ്രിൽ ഒന്നിന് വിചാരണ കോടതിയിൽ ഹാജരാക്കിയ കെജ്രിവാളിന്റെ കസ്റ്റഡി വീണ്ടും നീട്ടുകയായിരുന്നു.
Discussion about this post