ന്യൂഡൽഹി: ഐപിഎൽ മത്സരത്തിനിടെ അരവിന്ദ് കെജ്രിവാളിന്റെ അറസ്റ്റിനെതിരെ മുദ്രാവാക്യം വിളിച്ച ആറ് ആം ആദ്മി പ്രവർത്തകർക്കെതിരെ കേസെടുത്ത് ഡൽഹി പോലീസ്. കഴിഞ്ഞ ദിവസം അരുൺ ജെയ്റ്റ്ലി സ്റ്റേഡിയത്തിൽ നടന്ന ഐപിഎൽ മത്സരത്തിനിടെയായിരുന്നു എഎപിയുടെ വിദ്യാർത്ഥി പ്രസ്ഥാനത്തിലെ പ്രവർത്തകർ കെജ്രിവാളിന് വേണ്ടി മുദ്രാവാക്യം വിളിച്ചത്. ഡൽഹി കാപ്പിറ്റൽസിന്റെയും രാജസ്ഥാൻ റോയൽസിന്റെയും മത്സരമായിരുന്നു സ്റ്റേഡിയത്തിൽ നടന്നിരുന്നത്.
‘ജയിലിന് മറുപടി വോട്ടിലൂടെ’ എന്നെഴുതിയ മഞ്ഞ നിറത്തിലുള്ള ടിഷർട്ട് ധരിച്ചുകൊണ്ടായിരുന്നു വിദ്യാർത്ഥികൾ സ്റ്റേഡിയത്തിൽ എത്തിയത്. ടി ഷർട്ടിൽ കെജ്രിവാളിന്റെ ചിത്രവും പ്രിന്റ് ചെയ്തിട്ടുണ്ടായിരുന്നു.
‘അരുൺ ജെയ്റ്റ്ലി സ്റ്റേഡിയത്തിലെ ഐപിഎൽ മത്സരത്തിനിടെ മദ്യനയ കേസിൽ അറസ്റ്റിലായ ഡൽഹി മുഖ്യമന്ത്രി അരവിന്ദ് കെജ്രിവാളിന്റെ അറസ്റ്റിൽ പ്രതിഷേധിച്ച് മുദ്രാവാക്യം വിളിച്ച ആറ് പേരെ അറസ്റ്റ് ചെയ്തിട്ടുണ്ട്. ആം ആദ്മി പാർട്ടിയുടെ വിദ്യാർത്ഥി പ്രസ്ഥാനത്തിലെ പ്രവർത്തകർക്കെതിരെയാണ് കേസെടുത്തിരിക്കുന്നത്. പൊതുജനങ്ങൾക്ക് ഉപദ്രവമുണ്ടാക്കിയ കേസിലാണ് കേസ്. നിയമപരമായ നടപടി ക്രമങ്ങൾക്ക് ശേഷം ഇവരെ വിട്ടയയ്ക്കും’- ഡൽഹി പോലീസിലെ ഉയർന്ന ഉദ്യോഗസ്ഥൻ പറഞ്ഞു.
