ന്യൂഡൽഹി: മോദി സർക്കാർ വീണ്ടും അധികാരത്തിൽ വരുമെന്ന് കേന്ദ്ര ധനമന്ത്രി നിർമല സീതാരാമൻ. ബിജെപിയുടെ നേതൃത്വത്തിലുള്ള എൻഡിഎ സർക്കാർ മൂന്നാം തവണയും അധികാരത്തിൽ വരും. സ്ഥിരതയും ഉറപ്പുള്ള സർക്കാരിനെയാണ് ജനങ്ങൾ ആഗ്രഹിക്കുന്നത്. കഴിഞ്ഞ പത്ത് വർഷത്തെ പ്രധാനമന്ത്രി നരേന്ദ്ര മോദിയുടെ പ്രവർത്തനങ്ങൾ കണ്ട് അദ്ദേഹത്തെ വീണ്ടും തിരഞ്ഞെടുക്കാൻ ജനങ്ങൾ തീരുമാനിച്ചുകഴിഞ്ഞുവെന്നും നിർമല സീതാരാമൻ പറഞ്ഞു. ദേശീയ മാദ്ധ്യമത്തിന് നൽകിയ അഭിമുഖത്തിലായിരുന്നു അവർ മോദി ബിജെപിയുടെ വിജയത്തിൽ ആത്മവിശ്വാസം പ്രകടിപ്പിച്ചത്.
‘മൂന്നാം സർക്കാരിനായി പ്രധാനമന്ത്രി നരേന്ദ്ര മോദി തീർച്ചയായും തിരിച്ചുവരും. ഞങ്ങൾ തിരികെ വരുകയാണ്. സ്ഥിരതയാർന്ന സർക്കാരിരെയാണ് ജനങ്ങൾ ആഗ്രഹിക്കുന്നത്. സർക്കാരിലുള്ള ഉറപ്പാണ് അവർക്ക് വേണ്ടത്. പത്ത് വർഷങ്ങൾ കൊണ്ട് മോദി എന്താണ് ചെയ്തതെന്ന് ജനങ്ങൾ കണ്ടതാണ്. ആളുകളുടെ ഉദ്ദേശശുദ്ധി വ്യക്തമാണ്. വോട്ട് ചെയ്യാനായി നിൽക്കുന്ന സ്ത്രീകളും കുട്ടികളും ഉൾപ്പെടെയുള്ളവരുടെ നീണ്ട നിര നിങ്ങൾക്ക് കാണാൻ സാധിക്കും. കേന്ദ്ര സർക്കാർ കൊണ്ടുവന്ന പദ്ധതികളുടെയെല്ലാം ആനുകൂല്യങ്ങൾ തങ്ങൾക്ക് ലഭിച്ചുവെന്ന് അവരെല്ലാം ഉറപ്പിച്ചു പറയുന്നു. വാഗ്ദാനങ്ങളല്ല, ആനുകൂല്യങ്ങളാണ് അവർക്ക് ലഭിച്ചിട്ടുള്ളത്’- ധനമന്ത്രി പറഞ്ഞു.
കോൺഗ്രസ് നേതാവ് രാഹുൽ ഗാന്ധിക്കെതിരെയും അവർ വിമർശനമുന്നയിച്ചു. തെളിവില്ലാത്ത കാര്യങ്ങൾ പറയാൻ രാഹുൽ ഗാന്ധി മിടുക്കനാണ്. 2014-15 വർഷങ്ങൾ മുതൽ ഈ ഗെയിം അദ്ദേഹം പരീഷിച്ചുവരികയാണ്. സുപ്രീം കോടതിയിൽ പോയി അദ്ദേഹത്തിന് മാപ്പു പറയേണ്ടി വരുമെന്നും നിർമല സീതാരാമൻ പറഞ്ഞു.
