ബംഗളൂരു: ബംഗളൂരുവിലെ ഹോട്ടലുകൾക്ക് നേരെ ബോംബ് ഭീഷണി. ഒട്ടേര ഹോട്ടൽ ഉൾപ്പെടെയുള്ള മൂന്ന് ആഡംബര ഹോട്ടലുകൾക്ക് നേരെയാണ് ഭീഷണി വന്നത്. ഇ-മെയിലിലൂടെയായിരുന്നു ഭീഷണി സന്ദേശമെത്തിയത്.
സംഭവത്തെ തുടർന്ന് ബോംബ് സ്‌ക്വാഡും പോലീസും ചേർന്ന് ഹോട്ടലുകളിൽ തിരച്ചിൽ നടത്തുകയാണെന്ന് ബംഗളൂരു സൗത്ത് ഈസ്റ്റ് ഡിസിപി അറിയിച്ചു. ഇ-മെയിലിന്റെ ഉറവിടത്തെ കുറിച്ച് അന്വേഷണം ആരംഭിച്ചതായും ഡിസിപി അറിയിച്ചു.
ഇന്നലെ കേന്ദ്ര ആഭ്യന്തര മന്ത്രാലയത്തിന് നേരെ ബോംബ് ഭീഷണിയുയർന്നതിന് പിന്നാലെയാണ് ഇപ്പോൾ ബംഗളൂരുവിലും ഭീഷണി സന്ദേശമെത്തിയിരിക്കുന്നത്. ആഭ്യന്തര മന്ത്രാലയത്തിന് ബോംബ് ഭീഷണിയുയർത്തി ഇന്നലെ വൈകീട്ടോടെയാണ് ഇ-മെയിൽ എത്തിയത്. പോലീസും ബോംബ് സ്‌ക്വാഡും ചേർന്ന് ഇന്നലെ വ്യാപക പരിശോധന നടത്തിെയങ്കിലും സംശയാസ്പദമായി ഒന്നും തന്നെ കണ്ടെത്താനായിരുന്നില്ല. ഡൽഹിയിലെ നോർത്ത് ബ്ലോക്കിലേക്ക് ഭീകരാക്രമണം നടത്തുമെന്നാണ് സന്ദേശമെത്തിയത്. നേരത്തെ ഡൽഹിയിലെ സ്‌കൂളുകളിലേക്ക് സമാന രീതിയിൽ സന്ദേശമെത്തിയിരുന്നു. ഇതിൽ അന്വേഷണം തുടരുന്നതിനിടെയാണ് വീണ്ടും ഭീഷണി സന്ദേശങ്ങളെത്തുന്നത്.
