യാത്ര ചെയ്യാൻ ഇഷ്ടമല്ലാത്തവരായി ആരുണ്ടല്ലേ… മനസിന് ഇത്തിരി ആശ്വാസം ലഭിക്കാനും വിനോദത്തിനുമെല്ലാം യാത്രകൾ ഉപകരിക്കുന്നു. പക്ഷേ ഒരു യാത്ര ചെയ്യാനായി വാഹനത്തിൽ കയറി ഇരുന്ന് പിറ്റേ നിമിഷം മുതൽ ഓക്കാനം വരുന്ന വ്യക്തികളെ കുറിച്ച് ചിന്തിച്ച് നോക്കൂ. എന്തൊരു കഷ്ടമാണ് ഈ അവസ്ഥ അല്ലേ.
മൂന്നിൽ ഒരാളെ എന്ന നിലയിൽ ബാധിക്കുന്ന ഒരു പ്രശ്നമാണ് മോഷൻ സിക്ക്നസ്. കണ്ണുകൾ തലച്ചോറിന് നൽകുന്ന ദൃശ്യങ്ങളുടെ വിവരവും ചെവിയുടെ ആന്തരിക ഭാഗം നൽകുന്ന സെൻസറി വിവരങ്ങളും തമ്മിലുള്ള പൊരുത്തക്കേട് തലച്ചോറിന് ഉണ്ടാക്കുന്ന ആശയക്കുഴപ്പമാണ് മോഷൻ സിക്ക്നസിന്റെ കാരണം. നാം ചലിക്കുകയാണോ അനങ്ങാതിരിക്കുകയാണോ എന്നെല്ലാം തലച്ചോർ അറിയുന്നത് കണ്ണുകളും കൈകാലുകളും ചെവിക്കുള്ളിലെ ബാലൻസ് നിലനിർത്തുന്ന എൻഡോലിംഫ് ദ്രാവകവുമെല്ലാം തലച്ചോറിലേക്ക് അയയ്ക്കുന്ന സന്ദേശങ്ങൾ വിലയിരുത്തിയാണ്. യാത്രാവേളയിൽ ഈ സന്ദേശങ്ങൾ തമ്മിലുള്ള പൊരുത്തക്കേട് തലച്ചോറിനെ ആശയക്കുഴപ്പത്തിലാക്കി മോഷൻ സിക്ക്നസിലേക്ക് നയിക്കും. ഉത്കണ്ഠ, സമ്മർദം, ക്ഷീണം എന്നിവയുണ്ടെങ്കിൽ ഈ ലക്ഷണങ്ങൾ കൂടും
ആന്റിഹിസ്റ്റമിൻ, ആന്റിമെറ്റിക്സ് മരുന്നുകൾ ഉപയോഗിക്കാവുന്നതാണ്. യാത്ര തുടങ്ങുന്നതിന് ഒരു മണിക്കൂർ മുൻപ് ഇവ കഴിക്കേണ്ടതാണ്. എന്നാൽ, ഇവയിൽ പലതും ക്ഷീണം ഉണ്ടാക്കുന്നവയായതിനാൽ ഡോക്ടർ ശിപാർശ ചെയ്യുന്ന അളവിനും മുകളിൽ ഇവ കഴിക്കാതിരിക്കാൻ പ്രത്യേകം ശ്രദ്ധിക്കണം. ചില ആയുർവേദ പൊടിക്കൈകളും ഉപയോഗിക്കാം. ഉദാഹരണത്തിന് ഇഞ്ചി, ജീരകം, ഏലക്ക, അശ്വഗന്ധ, ത്രിഫല, നെല്ലിക്ക എന്നിവ യാത്രാവേളകളിൽ ഭക്ഷണത്തിൽ ഉപയോഗിക്കാവുന്നതാണ്.
കൈത്തണ്ടയിൽ പി-6(നയ് ഗുൻ) എന്ന പ്രഷർ പോയിന്റ് ഉണ്ട്. ഇതിന്റെ ഇരു വശങ്ങളിലും മസാജ് ചെയ്ത് മർദ്ദം ചെലുത്തിയാൽ ഓക്കാനം വരുന്നതിന് പരിഹാരമാകും.
Discussion about this post