ന്യൂഡൽഹി : ഇന്ത്യയിൽ ഗെയിമിംഗ് വിപണി വലിയ നേട്ടത്തിലേക്കാണ് കുതിക്കുന്നതെന്ന് പ്രധാനമന്ത്രി നരേന്ദ്രമോദി. ഒരു ദേശീയ ചാനലിന് നൽകിയ അഭിമുഖത്തിൽ ആയിരുന്നു പ്രധാനമന്ത്രിയുടെ ഈ ശ്രദ്ധേയമായ പരാമർശം. താൻ അടുത്തിടെ ചില യുവ ഗെയിമർമാരുമായി ആശയവിനിമയം നടത്തിയതായും മികച്ച സൃഷ്ടികൾക്ക് സർക്കാരിന്റെ എല്ലാ പിന്തുണയും വാഗ്ദാനം ചെയ്തതായും പ്രധാനമന്ത്രി വ്യക്തമാക്കി.
ആഗോള ഗെയിമിംഗ് വിപണിക്ക് ഇന്ത്യ നേതൃത്വം നൽകുന്ന കാലം വിദൂരമല്ല. നിലവിൽ ഇന്ത്യക്കാർ വലിയ തുക നിക്ഷേപിക്കുകയും മറ്റുള്ളവർ ഗെയിമിംഗ് വ്യവസായത്തിൽ വൻ ലാഭം നേടുകയും ചെയ്യുന്നതാണ് പലയിടത്തും നടക്കുന്നത്. എന്നാൽ ഇന്ത്യൻ ഗെയിമർമാർ യഥാർത്ഥ ജീവിതവുമായി ബന്ധപ്പെടുത്താൻ കഴിയുന്ന മികച്ച ഗെയിമുകൾ സൃഷ്ടിക്കുന്നുണ്ട്. വലിയ ഗെയിമിംഗ് വിപണി തന്നെ ഇന്ത്യയിൽ ഗെയിമർമാരെ കാത്തിരിക്കുന്നുണ്ട് എന്നും പ്രധാനമന്ത്രി വ്യക്തമാക്കി.
ഒളിമ്പിക്സുമായി ബന്ധപ്പെട്ട ഗെയിമുകൾ ഇപ്പോൾ പുറത്തിറങ്ങിയിട്ടുണ്ട്. ഇന്ത്യൻ യുവാക്കൾ ഇതിൽ പങ്കെടുക്കണമെന്ന് ഞാൻ ആഗ്രഹിക്കുന്നു. കഴിഞ്ഞ സാമ്പത്തിക വർഷത്തിൽ 3.1 ബില്യൺ ഡോളർ വരുമാനമാണ് ഇന്ത്യൻ ഗെയിമിംഗ് വ്യവസായം സ്വന്തമാക്കിയിട്ടുള്ളത്. ചെറിയ പട്ടണങ്ങളിലും നഗരങ്ങളിലും പോലും മികച്ച പ്രതിഭകളെ ഗെയിമിംഗ് വിപണി സൃഷ്ടിക്കുന്നുണ്ട്. ചില പ്രധാന ഇന്ത്യൻ ഗെയിമർമാരുമായി ഫലപ്രദമായ ചർച്ചകൾ നടത്താൻ കഴിഞ്ഞതിൽ സന്തോഷമുണ്ടെന്നും പ്രധാനമന്ത്രി നരേന്ദ്രമോദി വ്യക്തമാക്കി.
