വാഷിംഗ്ടൺ: ഇന്ത്യൻ സമ്പദ് വ്യവസ്ഥയുടെ ഉയർന്ന റേറ്റിംഗ് നിലനിർത്തി അമേരിക്കൻ റേറ്റിംഗ് ഏജൻസി ഭീമന്മാരായ എസ് ആൻ്റ് പി ഗ്ലോബൽ. കൂടാതെ ഇന്ത്യൻ സമ്പദ് വ്യവസ്ഥയെ ‘സ്ഥിര’മായി നിൽക്കുന്നത് എന്ന വിശേഷണത്തിൽ നിന്നും ‘പോസിറ്റീവ്’ എന്നാക്കി റേറ്റിംഗ് ഏജൻസി ഉയർത്തുകയും ചെയ്തു.
ഇന്ത്യൻ സമ്പദ് വ്യവസ്ഥയുടെ മികച്ച സാമ്പത്തിക അടിത്തറ കാരണം അടുത്ത രണ്ടോ മൂന്നോ വർഷത്തിനുള്ളിൽ വളർച്ചയുടെ ആക്കം കൂട്ടുമെന്ന് ഞങ്ങൾ പ്രതീക്ഷിക്കുന്നു,” എസ് ആൻ്റ് പി പറഞ്ഞു. സാമ്പത്തിക പരിഷ്കാരങ്ങളിലും ധനനയങ്ങളിലും പൊതുവായ തുടർച്ചയാണ് റേറ്റിംഗ് ഏജൻസി പ്രതീക്ഷിക്കുന്നത്.
രാജ്യത്തിൻ്റെ ശക്തമായ സാമ്പത്തിക വളർച്ച, സർക്കാർ നേരിട്ട് നടപ്പാക്കുന്ന പദ്ധതികളിലെ ഗുണമേന്മയിൽ ഉണ്ടായ ഗണ്യമായ വർദ്ധനവ്, ധനപരമായ ഏകീകരണത്തിനുള്ള സർക്കാരിൻ്റെ പ്രതിബദ്ധത എന്നിവയെ അടിസ്ഥാനമാക്കിയുള്ളതാണ് എസ് ആൻ്റ് പിയുടെ ഇന്ത്യയെക്കുറിച്ചുള്ള ഇപ്പോൾ പുറത്ത് വന്നിരിക്കുന്ന നല്ല വീക്ഷണം.
എസ് ആൻ്റ് പി ഗ്ലോബൽ റേറ്റിംഗ്സ് എന്നത് ഒരു അമേരിക്കൻ ക്രെഡിറ്റ് റേറ്റിംഗ് ഏജൻസിയും സ്റ്റോക്കുകൾ, ബോണ്ടുകൾ, ചരക്കുകൾ എന്നിവയെക്കുറിച്ചുള്ള സാമ്പത്തിക ഗവേഷണവും വിശകലനവും പ്രസിദ്ധീകരിക്കുന്ന എസ് ആൻ്റ് പി ഗ്ലോബലിൻ്റെ ഒരു ഡിവിഷനുമാണ്. മൂഡീസ് ഇൻവെസ്റ്റേഴ്സ് സർവീസ്, ഫിച്ച് റേറ്റിംഗുകൾ എന്നിവയും ഉൾപ്പെടുന്ന ബിഗ് ത്രീ ക്രെഡിറ്റ് റേറ്റിംഗ് ഏജൻസികളിൽ ഏറ്റവും വലുതായിട്ടാണ് എസ് ആൻ്റ് പി കണക്കാക്കപ്പെടുന്നത് .
