ആയിരം ആരാധകർക്ക് സൗജന്യ ആലിംഗനം നൽകി ബിടിഎസ് താരം ജിൻ. ഏറ്റവും പ്രായം കൂടിയ ബിടിഎസ് താരമായ ജിൻ തന്റെ സൈനിക സേവന കാലാവധി അവസാനിച്ചതിന് പിന്നാലെയാണ് ആരാധകർക്ക് ‘ഫ്രീ ഹഗ്ഗു’മായി എത്തിയത്. സിയോളിൽ നടന്ന പരിപാടിയിലാണ് ജിൻ തന്റെ ബിടിഎസിലേക്കുള്ള തിരിച്ചുവരവ് ആഘോഷമാക്കിയത്.
ഏഴ് അംഗ ബോയ് ബാൻഡ് ആയ ബിടിഎസിലെ സൈനിക സേവനം പൂർത്തിയാക്കിയ ആദ്യ വ്യക്തിയാണ് ജിൻ. വലിയ ആരവത്തോടെയാണ് ജിന്നിനെ ആരാധകർ സ്വാഗതം ചെയ്തത്. ബാൻഡിലെ ഏറ്റവും പ്രായം കൂടിയ വ്യക്തിയാണ് 31കാരനായ ജിൻ. ജിന്നിന് ആശംസകൾ അറിയിക്കുന്നതിനായി ബിടിഎസിലെ മറ്റ് അംഗങ്ങളും എത്തിയിരുന്നു.
ദഷിണ കൊറിയയിൽ ശാരീരിക പ്രശ്‌നങ്ങളൊന്നുമില്ലാത്ത 18നും 35നും ഇടയിൽ പ്രായമുള്ള എല്ലാ പുരുഷന്മാരും സൈനിക സേവനമനുഷ്ഠിക്കണം. ബിടിഎസിലെ ബാക്കി അംഗങ്ങളും 2025 ഓടെ തങ്ങളുടെ നിർബന്ധിത സൈനിക സേവനം പൂർത്തിയാക്കും. ഇതോടെ തങ്ങളുടെ പ്രിയപ്പെട്ട ബിടിഎസ് വീണ്ടും കൂടുതൽ ശക്തിയോടെ തിരിച്ചുവരുമെന്ന പ്രതീക്ഷയിലാണ് ആരാധകർ.
