ശക്തികാരണവും ഭംഗികാരണവും ഇരപിടുത്തത്തിലെ ചടുതലകൊണ്ടെല്ലാം പലതരം പാമ്പിനങ്ങൾ പ്രശസ്തരാവാറുണ്ട്. എന്നാൽ പാമ്പു പ്രേമികൾക്കിടയിൽ, ലോകപ്രശസ്തനായ ക്രിക്കറിന്റെ പേരിൽ അറിയപ്പെടുന്ന പാമ്പുകളുമുണ്ട്. അതിലൊന്നാണ്.. കോലി സാറെന്ന നീർക്കോലി. വിരാട് കോഹ്ലിയുടെ പേരിൽ അറിയപ്പെടുന്നതിനാൽ തന്നെ ഇവയ്ക്ക് ഈയിടയായി അൽപ്പം ജാഡകൂടിയിട്ടുണ്ടെന്നാണ് ഫാൻസുകാരുടെ പോലും ഭാഷ്യം.
എന്തായാലും കരിമൂർഖൻ മുതൽ പെരുമ്പാമ്പ് വരെ വാഴുന്ന പാമ്പുകളുടെ ലോകത്ത് നീർക്കോലിയെന്ന പുളയൻ എന്നും പ്രത്യേകസ്ഥാനമുണ്ട്. അൽപ്പം നീർക്കോലി വിശേഷങ്ങളായാലോ? പൊതുവെ ചേരസാറിനെ പോലെ മനുഷ്യൻ വിലകൽപ്പിക്കാതെ പുച്ഛിച്ചുതള്ളുന്ന പാമ്പിനമാണ് നീർക്കോലി. വിഷമില്ല എന്നത് തന്നെയാണ് നിർക്കോലിയുടെ മാർക്കറ്റ് ഇടിക്കുന്നത്. പൊതുവെ മെലിഞ്ഞിരിക്കുന്ന ആളുകളെ പരിഹസിക്കാൻ വരെ നീർക്കോലിയെന്നാണ് മനുഷ്യനുപയോഗിക്കുന്നത്. നീർക്കോലി കടിച്ചാലും അത്താഴം മുടങ്ങും എന്ന് വരെ പഴഞ്ചൊല്ല് ഉണ്ടാക്കിയിട്ടുണ്ട് ഈ മനുഷ്യർ.
പേരിന് അത്ര സ്റ്റൈൽ പോരെങ്കിലും കാണാൻ സ്റ്റെലനാണ് ഈ നീർക്കോലി. ഇളം തവിട്ടുനിറത്തിേലോ മഞ്ഞ കലർന്ന തവിട്ടുനിറത്തിലോ ആണ് ഇവയെ കാണാനാവുക. ശരീരവർണ്ണത്തിൽ തവിട്ടുനിറം ഏറിയും കുറഞ്ഞുമിരിക്കും. ശരീരത്തിനടിഭാഗം ഇളം നിറത്തിലായിരിക്കും. അടിഭാഗവും മുകൾഭാഗവും ചേരുന്ന ഭാഗത്തുകൂടി ചെറുതായി പച്ചനിറം ചാലിച്ചു ചേർത്തതു പോലെ കാണാവുന്നതാണ്. അങ്ങനെ കണ്ട ചേറിലും ചെളിയിലും പോയി ജീവിക്കാനെന്നും നീർക്കോലി സാറിനെ കിട്ടില്ല. പൂർണമായും ശുദ്ധജലജീവിയാണ് നീർക്കോലി. കുളങ്ങൾ, തോടുകൾ, കണ്ടങ്ങൾ തുടങ്ങിയവയിലും സമീപപ്രദേശങ്ങളിലും പരക്കെ കാണുന്നു.
Colubridae കുടുംബത്തിലെ അംഗമാായ ഇവയുടെ ശാസ്ത്രീയ നാമം Xenochrophis piscator എന്നാണ്.ഒരു മീറ്റർ വരെയാണ് സാധാരണ ശരീരനീളം. തല കോഴിമുട്ടയുടെ ആകൃതിയിലാണ് കാണപ്പെടുന്നത്. മേൽച്ചുണ്ടിൽ മദ്ധ്യത്തിലായി ലംബമായ ചെറിയൊരു വെട്ടും കാണാൻ സാധിക്കും. ശരീരത്തിൽ ചതുരാകൃതിയിൽ ഏതാണ്ട് ചെസ്ബോർഡിലേതുപോലെയുള്ള അടയാളങ്ങൾ കാണാവുന്നതാണ്. വളർച്ചയുടെ പലഘട്ടങ്ങളും അടയാളത്തിന് ഏറ്റക്കുറച്ചിലുണ്ടാവാറുണ്ട്. കണ്ണിന് താഴെ വാലിട്ടെഴുതിയതുപോലെ ഒരു വരയും ഇവരെ ആകർഷകമാക്കുന്നു. പെൺജാതികൾക്ക് ആൺ നീർക്കോലികളേക്കാളും ശരീരവലിപ്പമുണ്ടാകാറുണ്ട്.
സുന്ദരന്മാർ മാത്രമല്ല, അസ്സൽ നീന്തൽ വിദഗ്ധർ കൂടിയാണ് നീർക്കോലി. ജലത്തിനടിയിലൂടെയും ഉപരിതലത്തിലൂടെയും അതിവേഗത്തിൽ നീന്താനുള്ള കഴിവുണ്ടിവയ്ക്ക്. തവളകളും മത്സ്യവും ആണ് പ്രധാന ഭക്ഷണം. മറ്റു ചെറു ജീവികളേയും ഭക്ഷിക്കുന്നു.
ജലാശയങ്ങളുടെ സമീപത്തുള്ള പൊത്തുകളിലാണ് ഇവ മുട്ടയിടുക. 50 മുതൽ 75 വരെ മുട്ടയിടുന്നു. മുട്ടവിരിയുവാൻ 2 മാസക്കാലം എടുക്കുന്നു. മഴക്കാലമാകുമ്പോഴേയ്ക്കും വിരിയത്തക്ക വിധത്തിലാണ് മുട്ടയിടുക. വിഷമില്ലാത്ത ഇനമായതിനാൽ മുട്ടവിരിഞ്ഞിറങ്ങുന്ന കുഞ്ഞുങ്ങളെ തവളകൾ വരെ ഭക്ഷണമാക്കുന്നു. മുട്ടയിട്ട ശേഷവും ഇണകൾ ഒരുമിച്ചു ജീവിക്കുന്ന സ്വഭാവമുണ്ട്.
മനുഷ്യർക്ക് പൊതുവേ നിരുപദ്രവകാരിയായ ജീവിയാണെങ്കിലും അപകടഘട്ടത്തിൽ ശത്രുവിനെ അറഞ്ചം പുറഞ്ചം കടിച്ച് രക്ഷപ്പെടാനുള്ള ഇവയുടെ ശ്രമം പ്രസിദ്ധമാണ്. കുളക്കടവിലും കണ്ടത്തിലും പോയി നീർക്കോലി ആക്രമിക്കുന്നതിനു മുമ്പ് ശരീരം അൽപം പരത്തി മണ്ണിൽ ചേർന്നിരിക്കുന്ന സ്വഭാവം കണ്ടുവരുന്നു.
ഇന്ത്യയെ കൂടാതെ അഫ്ഗാനിസ്ഥാൻ, പാകിസ്താൻ, ശ്രീലങ്ക, മ്യാന്മാർ, തായ്ലൻഡ്, ലാവോസ്, വിയറ്റ്നാം, പടിഞ്ഞാറൻ മലേഷ്യ, ചൈനയുടെ തെക്കൻ പ്രവിശ്യകൾ, തായ്വാൻ, ഇൻഡോനേഷ്യ തുടങ്ങിയ പ്രദേശങ്ങളിൽ സാധാരണ കണ്ടുവരുന്നു. ഇത്രയൊക്കെ നീർക്കോലിയെ കുറിച്ച് അറിഞ്ഞസ്ഥിതിയ്ക്ക് വഴിയിലെവിടെയെങ്കിലും കണ്ടാൽ സലാം പറഞ്ഞ് കടിവാങ്ങിക്കാതെ ഒരു മൂലയ്ക്കോട്ട് മാറി നിന്ന് കോലിസാറിന് വഴിമാറിക്കൊടുക്കാൻ മറക്കല്ലേ…
Discussion about this post