മുംബൈ: മഹാരാഷ്ട്രയിൽ റോഡിലൂടെ നടന്ന് നീങ്ങി ഭീമൻ മുതല. രത്‌നഗിരിയിലെ ചിപുലാൻ മേഖലയിൽ ആയിരുന്നു സംഭവം. റോഡിലൂടെ മുതല നടന്ന് നീങ്ങുന്നതിന്റെ ദൃശ്യങ്ങൾ സമൂഹമാദ്ധ്യമങ്ങളിൽ വ്യാപകമായി പ്രചരിക്കുന്നുണ്ട്.
ഇന്നലെ രാത്രിയായിരുന്നു റോഡിൽ മുതലയെത്തിയത് എന്നാണ് വിവരം. ഈ സമയം റോഡിലൂടെ സവാരി പോകുകയായിരുന്ന ഓട്ടോറിക്ഷ ഡ്രൈവർ ആണ് മുതലയുടെ ദൃശ്യങ്ങൾ പകർത്തിയത്. ഭീമാകാരമായ എന്തോ ഒന്ന് റോഡിലൂടെ ഓട്ടോറിക്ഷയുടെ നേർക്ക് നടന്ന് നീങ്ങുന്നത് കണ്ട് അദ്ദേഹം വാഹനം നിർത്തുകയായിരുന്നു. അൽപ്പനേരത്തിന് ശേഷമാണ് മുതലയാണെന്ന് വ്യക്തമായതെന്ന് അദ്ദേഹം പറയുന്നു. സംഭവ സമയം വേറെയും വാഹനങ്ങൾ അതുവഴി കടന്ന് പോയിരുന്നു.
മുതലയ്ക്ക് എട്ടടി നീളം ഉണ്ടാകും എന്നാണ് വിവരം. കഴിഞ്ഞ ഏതാനും ദിവസങ്ങളായി ശക്തമായ മഴയാണ് മേഖലയിൽ അനുഭവപ്പെടുന്നത്. ഇതേ തുടർന്ന് പ്രദേശത്തെ പുഴകളും മറ്റ് ജലാശയങ്ങശളും നിറഞ്ഞ് കവിഞ്ഞിട്ടുണ്ട്. ഈ മേഖലയ്ക്ക് അടുത്താണ് ശിവ റിവർ. ഇവിടെ നിന്നും എത്തിയതാകാം മുതലയെന്നാണ് നിഗമനം.
അതേസമയം വഴിയിൽ മുതലയെ കണ്ടത് ആളുകളിൽ ഭീതി പടർത്തിയിട്ടുണ്ട്. പ്രദേശത്ത് ഇപ്പോഴും കനത്ത മഴ തുടരുകയാണ്. അതിനാൽ വരും ദിവസങ്ങളിലും സമാന സംഭവങ്ങൾ ഉണ്ടായേക്കാമെന്നാണ് സംശയിക്കുന്നത്.
Discussion about this post