തിരുവനന്തപുരം: വടക്കൻ കേരളത്തിലെ ഭീതിയിലാഴ്ത്തി അതിശക്തമായ മഴ. വരും മണിക്കൂറുകളിൽ അതിതീവ്ര മഴ ലഭിക്കാനാണ് സാദ്ധ്യതയെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. ഇതേ തുടർന്ന് നാല് ജില്ലകളിൽ റെഡ് അലർട്ട് ഏർപ്പെടുത്തിയിട്ടുണ്ട്.
കോഴിക്കോട്, വയനാട്, കണ്ണൂർ, കാസർകോട് ജില്ലകളിലാണ് റെഡ് അലർട്ടുള്ളത്. നേരത്തെ ജില്ലകളിൽ ഓറഞ്ച് അലർട്ടായിരുന്നു ഏർപ്പെടുത്തിയിരുന്നത്. എന്നാൽ മഴ കനക്കാൻ സാദ്ധ്യതയുള്ള പശ്ചാത്തലത്തിൽ റെഡ് അലർട്ട് ആക്കി മുന്നറിയിപ്പ് പുന:ക്രമീകരിക്കുകയായിരുന്നു.
മലപ്പുറം മുതൽ എറണാകുളംവരെയുള്ള ജില്ലകളിൽ ഓറഞ്ച് അലർട്ടാണ്. പത്തനംതിട്ട, കോട്ടയം, ആലപ്പുഴ എന്നീ ജില്ലകളിൽ യെല്ലോ അലർട്ടും ഏർപ്പെടുത്തിയിട്ടുണ്ട്. തിരുവനന്തപുരത്തും കൊല്ലത്തും മഴ മുന്നറിയിപ്പ് പുറപ്പെടുവിച്ചിട്ടില്ലെങ്കിലും മഴ ലഭിക്കും.
മഴയ്ക്ക് പുറമേ ശക്തമായ കാറ്റിനും സാദ്ധ്യതയുണ്ട്. കാസർകോട് മുതൽ എറണാകുളം വരെയുള്ള ജില്ലകളിലാണ് ശക്തമായ കാറ്റിന് സാദ്ധ്യതയുള്ളത്. അടുത്ത മൂന്ന് മണിക്കൂറിൽ 40 കിലോ മീറ്റർവരെ വേഗതയിൽ കാറ്റിന് സാദ്ധ്യതയുണ്ടെന്നാണ് മുന്നറിയിപ്പ്.
അതേസമയം മുണ്ടക്കൈയിൽ രക്ഷാ പ്രവർത്തനങ്ങൾ പുരോഗമിക്കുകയാണ്. ഇതിനിടെ മഴ രക്ഷാപ്രവർത്തനം കൂടുതൽ ദുഷ്‌കരമാക്കിയേക്കും. ഇന്ന് രാവിലെ മുതൽ കനത്ത മഴയാണ് പ്രദേശത്ത് ലഭിക്കുന്നത്.
