ന്യൂഡൽഹി: ഒളിമ്പിക്സ് ഹോക്കി താരം പിആർ ശ്രീജേഷിന് ഔദ്യോഗിക യാത്രയയപ്പ് നൽകിയിരിക്കുകയാണ് ഇന്ത്യ. ഏതൊരു താരവും ആഗ്രഹിച്ച് പോകുന്ന അസൂയാവഹമായ ആദരവാണ് ശ്രീജേഷിന് നൽകിയത്. ശ്രീജേഷിന്റെ വിടപറയൽ ചടങ്ങിനിടെ ചിരിപടർത്തുകയാണ് ഒളിമ്പിക്സ് ഇരട്ട വെങ്കലമെഡൽ ജേതാവ് മനു ഭാക്കർ. ശ്രീജേഷിന്റെ കരിയറിനു തന്റെ പ്രായമുണ്ടെന്നാണ് മനു വേദിയിൽ പറഞ്ഞത്. പരാജയങ്ങളെ എങ്ങനെയാണ് കൈകാര്യം ചെയ്തതെന്നും മനു ശ്രീജേഷിനോട് ചോദിച്ചു. തോൽവികളിൽ നിരാശപ്പെടരുതെന്നായിരുന്നു ശ്രീജേഷ് നൽകിയ മറുപടി.
ചടങ്ങിൽ ശ്രീജേഷിനു ഹോക്കി ഇന്ത്യ 25 ലക്ഷം രൂപ കാഷ് അവാർഡ് സമ്മാനിച്ചു. 16 -ാം നമ്പർ ജഴ്സി പിൻവലിച്ചു. ശ്രീജേഷിനോടുള്ള ആദര സൂചകമായിട്ടാണ് ജഴ്സി പിൻവലിച്ചത്. 16ാം നമ്പർ ജേഴ്സി ഇനി സീനിയർ ടീമിൽ ആർക്കും ലഭിക്കില്ല.ശ്രീജേഷ് എന്നെഴുതിയ ജഴ്സി അണിഞ്ഞായിരുന്നു സഹതാരങ്ങൾ വേദിയിൽ എത്തിയത്.
കേരളത്തിൽ ഹോക്കി വളർത്താൻ കുട്ടികൾക്ക് സാഹചര്യം ഒരുക്കണമെന്നും അദ്ദേഹം ആവശ്യപ്പെട്ടു. കൂടുതൽ ടൂർണമെന്റുകൾ സംഘടിപ്പിക്കണമെന്നും ശ്രീജേഷ്. വ്യക്തമാക്കി. ശാസ്ത്രീയമായ പരിശീലനം ആവശ്യമാണ്. ഹോക്കിക്ക് വേണ്ടി എന്തും ചെയ്യുമെന്നും സർക്കാരുമായി സഹകരിക്കാൻ തയ്യാറാണെന്നും അദ്ദേഹം പറഞ്ഞു.
കളിക്കളത്തിൽനിന്നു വിരമിച്ച് മണിക്കൂറുകൾക്കുള്ളിൽ തന്നെ ശ്രീജേഷിന് ഹോക്കി ഇന്ത്യ പുതിയ ചുമതലയും നൽകിയിരുന്നു. താരത്തെ ഇന്ത്യൻ ജൂനിയർ ഹോക്കി ടീമിന്റെ പരിശീലകനായി ഹോക്കി ഇന്ത്യ സെക്രട്ടറി ജനറൽ ബോലനാഥ് പ്രഖ്യാപിച്ചിരുന്നു.
Discussion about this post