ഒരു റീൽ മുഴുവൻ കാണാൻ പോലും ക്ഷമയില്ലാതെ അടുത്തതിലേക്ക് നീങ്ങുന്നുവോ?; പ്രശ്‌നമാണെന്ന് പഠനം

സോഷ്യൽമീഡിയ ലോകത്താണ് ഇന്ന് നാം ജീവിക്കുന്നത്. ജീവിതത്തിലെ എല്ലാ സുഖദു:ഖങ്ങളും സോഷ്യൽമീഡിയയിൽ പങ്കുവയ്ക്കപ്പെടുന്നു. നിരവധി വീഡിയോ കൺന്റുകളാണ് ദിനംപ്രതി നമ്മുടെ കൺമുൻപിലേക്ക് പല പ്ലാറ്റ്‌ഫോമുകളിലൂടെ വരുന്നത്. അത് കൊണ്ട് തന്നെ ഇന്ന് വെറുതെ ഇരുന്നാലും ക്ലാസ്‌റൂമിലായാലും ജോലി സ്ഥലത്തായാലും റീലുകൾ കാണുന്നതാണ് ആളുകളുടെ ഹോബി. ഇൻസ്റ്റഗ്രാം റീൽസും ഷോട്‌സും ഇങ്ങനെ തുടർച്ചയായി കാണുന്നവർക്ക് മുന്നറിയിപ്പ് നൽകുകയാണ് അമേരിക്കൻ സൈക്കോളജിക്കൽ അസോസിയേഷൻ.

വിരസത മാറ്റാനായി വീഡിയോകൾ തുടർച്ചയായി കണ്ടിരിക്കുന്നത് വിരസത രൂക്ഷമാക്കുമെന്ന് പഠനത്തിൽ സൂചിപ്പിക്കുന്നു. യുണിവേഴ്‌സിറ്റി ഓഫ് ടൊറന്റോയിലെ ഗവേഷകരാണ് പഠനത്തിനു പിന്നിൽ. മനുഷ്യന്റെ ശ്രദ്ധയും വിരസതയും തമ്മിൽ ബന്ധമുണ്ടത്രേ. ഒരാൾ വളരെ പെട്ടെന്ന് ഒരു വീഡിയോയിൽ നിന്ന് മറ്റൊന്നിലേക്ക് പോകുമ്പോൾ കണ്ടുകൊണ്ടിരിക്കുന്ന വീഡിയോയിൽ ശ്രദ്ധ കുറയുകയും കൂടുതൽ തൃപ്തികരമായ ഉള്ളടക്കങ്ങൾ പരതുകയും ചെയ്യുന്നു.1200 പേരെയാണ് പഠന വിധേയമാക്കിയത്. ദൈർഘ്യം കുറഞ്ഞ വീഡിയോകൾ പൂർത്തിയാക്കാതെ അടുത്ത റീലിലേക്ക് പോകുന്നവരിൽ വിരസത അനുഭവപ്പെടുന്നത് കൂടുതലാണെന്ന് പഠനത്തിൽ പറയുന്നു.

സോഷ്യൽ മീഡിയ ഉപയോഗം ഉത്കണ്ഠ, വിഷാദം, സമ്മർദ്ദം എന്നിവയിലേക്ക് നയിക്കുമെന്നാണ് പഠനം പറയുന്നത്.ബിഹേവിയർ ആൻഡ് ഇൻഫർമേഷൻ ടെക്‌നോളജി ജേണലിൽ പ്രസിദ്ധീകരിച്ച ഗവേഷണ പഠനത്തിലാണ് ഇത് സംബന്ധിച്ച് പറയുന്നത്. വ്യത്യസ്ത സോഷ്യൽ മീഡിയ ഉപയോഗ രീതികളും ഏകാന്തതയും മാനസിക ക്ലേശവും തമ്മിലുള്ള ബന്ധത്തെക്കുറിച്ച് ഗവേഷണം നടത്തുന്നതിനായി 18 നും 34 നും ഇടയിൽ പ്രായമുള്ള 288 വ്യക്തികളിൽ ഒരു സർവേ നടത്തി. മൂന്ന് തരത്തിലുള്ള സോഷ്യൽ മീഡിയ ഉപയോഗം പഠനമാണ് ഇതിലൂടെ പരിശോധിച്ചത്.

മറ്റ് ഉപയോക്താക്കൾ സൃഷ്ടിച്ച ഉള്ളടക്കം മാത്രം നോക്കുന്ന വ്യക്തികൾ,സ്വന്തം ഉള്ളടക്കം പോസ്റ്റ് ചെയ്യുമെങ്കിലും മറ്റ് ഉപയോക്താക്കളുമായി ഇടപഴകാത്തതുമായ വ്യക്തികൾ, സ്വന്തം ഉള്ളടക്കം പോസ്റ്റ് ചെയ്യുകയും മറ്റ് ഉപയോക്താക്കളുമായി ഇടപഴകുകയും ചെയ്യുന്ന വ്യക്തികൾ എന്നിങ്ങനെയാണഅ വേർതിരിച്ചത്. ആദ്യത്തെ വിഭാഗത്തിൽ കൂടുതൽ സമയം ചെലവഴിക്കുന്നവരിൽ ഉത്കണ്ഠ, വിഷാദം, സമ്മർദ്ദം എന്നിവയുണ്ടാകുമെന്ന് പഠനം കണ്ടെത്തി.