ന്യൂഡല്‍ഹി: അമിത വേഗതയില്‍ പോയ കാര്‍ നിര്‍ത്താനാവശ്യപ്പെട്ട പൊലീസുകാരനെ വാഹനമിടിച്ചു കൊലപ്പെടുത്തി. രാജ്യ തലസ്ഥാനമായ ഡല്‍ഹിയിലാണ് മനസാക്ഷിയെ മരവിപ്പിക്കുന്ന ഈ കൊലപാതകമുണ്ടായത്. പൊലീസ് കോണ്‍സ്റ്റബിളായ സന്ദീപ് (30) ആണ് അമിത വേഗം ചോദ്യം ചെയ്തതിന്റെ പേരില്‍ കൊല്ലപ്പെട്ടത്.
പ്രദേശത്ത് ബൈക്കില്‍ പട്രോളിങ് നടത്തവെ നംഗ്ലോയ് ഏരിയയിലൂടെ ഒരു കാര്‍ അമിത വേഗതയില്‍ പോകുന്നത് സന്ദീപിന്റെ ശ്രദ്ധയില്‍പ്പെട്ടു. ഇത് നിയമവിരുദ്ധവും അപകടകരവുമാണെന്നും അതിനാല്‍ വേഗത കുറച്ചു പോകാനും ഇവരോട് സന്ദീപ് ആവശ്യപ്പട്ടു. ഇതോടെ പ്രകോപിതരായ കാര്‍ യാത്രികര്‍ സന്ദീപിന്റെ ബൈക്ക് ഇടിച്ചു തെറിപ്പിക്കുകയായിരുന്നു.
ഇടിച്ച ശേഷം ഇദ്ദേഹത്തോടൊപ്പം ബൈക്ക് 10 മീറ്റര്‍ റോഡിലൂടെ വലിച്ചിഴച്ചു. കാറില്‍ രണ്ട് പേരാണ് ഉണ്ടായിരുന്നത്. ഗുരുതരമായി പരുക്കേറ്റ സന്ദീപിനെ ഉടന്‍ തന്നെ അടുത്തുള്ള ആശുപത്രിയില്‍ എത്തിച്ചെങ്കിലും അദ്ദേഹത്തിന്റെ ജീവന്‍ രക്ഷിക്കാനായില്ല.
അപകടത്തിനു പിന്നാലെ കാറിലുണ്ടായിരുന്ന യുവാക്കള്‍ വാഹനം ഉപേക്ഷിച്ചു രക്ഷപ്പെടുകയായിരുന്നു. അപകടത്തിന് കാരണമായ കാര്‍ കസ്റ്റഡിയില്‍ എടുത്തിട്ടുണ്ടെന്നും പ്രതികള്‍ക്കായി അന്വേഷണം നടത്തി വരികയാണെന്നും പൊലീസ് പറഞ്ഞു.സന്ദീപ് കാറിലുള്ളവരോട് വേഗത കുറയ്ക്കാന്‍ ആവശ്യപ്പെടുന്നതിന്റെ സിസിടിവി ദൃശ്യങ്ങളും പൊലീസിന് ലഭിച്ചിട്ടുണ്ട്. സന്ദീപിന്റെ കുടുംബത്തിന്റെ ദുഃഖത്തില്‍ പങ്കുചേരുന്നുവെന്നും പ്രതികളെ ഉടന്‍ പിടികൂടി കടുത്ത ശിക്ഷ ഉറപ്പാക്കുമെന്നും ഡല്‍ഹി പൊലീസ് അറിയിച്ചു.
Discussion about this post