ഇന്ത്യയാണ് മികച്ചത്,മാതൃക പിന്തുടർന്നാൽ ഒരൊറ്റഭൂമി മതി,മറിച്ചാണെങ്കിൽ ഏഴ് ഭൂമിയെ കണ്ടെത്തേണ്ടി വരും; ഭക്ഷണരീതി പ്രകൃതിയ്ക്കനുയോജ്യമെന്ന് പഠനം

ന്യൂഡൽഹി: ലോകത്തിലെ ഏറ്റവും മികച്ച ഭക്ഷണരീതി ഇന്ത്യയുടേതാണെന്ന് പഠനം. കഴിഞ്ഞ ദിവസം പുറത്തിറങ്ങിയ ലിവിങ് പ്ലാനറ്റ് റിപ്പോർട്ടിലാണ് ഇത് ചൂണ്ടിക്കാണിക്കുന്നത്. കാലാവസ്ഥയ്ക്ക് ഏറ്റവും അനുയോജ്യമായ വിധത്തിലുള്ളതാണ് ഇന്ത്യക്കാരുടെ ഭക്ഷണരീതിയെന്ന് വേൾഡ് വൈഡ് ഫണ്ട് ഫോർ നേച്ചർ വ്യക്തമാക്കുന്നു. ജി-20 രാജ്യങ്ങൾക്കിടയിൽ ഏറ്റവും പരിസ്ഥിതി സൗഹൃദപരമായ ഭക്ഷണരീതി പിന്തുടരുന്നത് ഇന്ത്യയാണെന്നും പഠനം ചൂണ്ടിക്കാണിക്കുന്നു.

കൂടുതൽ രാജ്യങ്ങൾ ഇന്ത്യയുടെ ഭക്ഷണ ശീലങ്ങൾ സ്വീകരിക്കുകയാണെങ്കിൽ, അത് പരിസ്ഥിതി നാശത്തിൽ ഗണ്യമായ കുറവുണ്ടാക്കുമെന്നും 2050-ഓടെ കാലാവസ്ഥാ വ്യതിയാനത്തിന്റെ ആഘാതം ലഘൂകരിക്കാൻ സഹായിക്കുമെന്നും റിപ്പോർട്ട് അടിവരയിടുന്നു.ആരോഗ്യപരമായ ഗുണങ്ങൾക്കും കാലാവസ്ഥാ വ്യതിയാനത്തിനെതിരായ പ്രതിരോധത്തിനും പേരുകേട്ട പുരാതന ധാന്യങ്ങളുടെ ഉപഭോഗം പുനരുജ്ജീവിപ്പിക്കാൻ ലക്ഷ്യമിട്ടുള്ള ഒരു സംരംഭമാണ് ഇന്ത്യയുടെ ദേശീയ മില്ലറ്റ് കാമ്പെയ്ൻ ആണ് റിപ്പോർട്ടിന്റെ പ്രധാന ശ്രദ്ധാകേന്ദ്രം

പാരിസ്ഥിതികമായി സുസ്ഥിരമായ ഭക്ഷണരീതികൾക്ക് അംഗീകാരം നേടിയ ഇന്തോനേഷ്യയും ചൈനയുമാണ് റാങ്കിംഗിൽ ഇന്ത്യയ്ക്ക് താഴെയുള്ളത്. യുകെ,അർജന്റീന,ഓസ്‌ട്രേലിയ തുടങ്ങിയ രാജ്യങ്ങളാണ് ഏറ്റവും മോശം ഭക്ഷണരീതി പിന്തുടരുന്നത്. ഈ രീതിയിൽ ലോകം മുന്നോട്ടുപോയാൽ ഹരിതഗൃഹവാതക ബഹിർഗമനം വർദ്ധിക്കും. ഇത് ആഗോളതാപവർദ്ധനവ് 1.5 ഡിഗ്രി സെൽഷ്യലിനുള്ളിൽ ചുരുക്കുക എന്ന ലക്ഷ്യത്തിലെത്തുന്നതിന് തടസ്സമാകും. അങ്ങനെയെങ്കിൽ ആഹാര ഉത്പാദനത്തിനായി ഈ ഭൂമി മതിയാകാതെ വരുമെന്നും പകം ഏഴ് ഭൂമി ആവശ്യമായി വന്നേക്കാമെന്നും റിപ്പോർട്ട് മുന്നറിയിപ്പ് നൽകുന്നു.

ലോകമെമ്പാടുമുള്ള പൊണ്ണത്തടി പകർച്ചവ്യാധിക്ക് ആക്കം കൂട്ടുന്ന, പ്രത്യേകിച്ച് കൊഴുപ്പുകളുടെയും പഞ്ചസാരയുടെയും, ആഗോള അമിത ഉപഭോഗത്തിലെ ഭയാനകമായ വർധനവാണ് റിപ്പോർട്ടിൽ ഉന്നയിക്കപ്പെട്ട പ്രധാന പ്രശ്നങ്ങളിലൊന്ന്.നിലവിൽ, 2.5 ബില്യണിലധികം മുതിർന്നവരെ അമിതഭാരമുള്ളവരായി തരംതിരിച്ചിട്ടുണ്ട്, ഏകദേശം 890 ദശലക്ഷം ആളുകൾ അമിതവണ്ണവുമായി ജീവിക്കുന്നു.