ന്യൂഡല്‍ഹി: സല്‍മാന്‍ ഖാനെ പന്‍വേലിലെ ഫാംഹൗസില്‍ വെച്ച് കൊലപ്പെടുത്താന്‍ പ്രതികള്‍ക്ക് ലഭിച്ചത് 25 ലക്ഷം രൂപയുടെ കരാറെന്ന് നവി മുംബൈ പോലീസ്. ലോറന്‍സ് ബിഷ്ണോയി സംഘത്തില്‍ നിന്നുള്ള അഞ്ച് പേര്‍ക്കെതിരെയുള്ള ചാര്‍ജ് ഷീറ്റിലാണ് പോലീസ് ഇക്കാര്യം പറയുന്നത്. ബിഷ്ണോയിയുടെ നേതൃത്വത്തിലുള്ള സംഘമാണ് കരാര്‍ എടുത്തതെന്നും ചാര്‍ജ് ഷീറ്റില്‍ വ്യക്തമാക്കുന്നുണ്ട്.
പാകിസ്ഥാനില്‍ നിന്ന് കൃത്യം നടത്തുന്നതിനായി നിന്ന് എകെ 47, എകെ 92, എം 16 എന്നിവയും പഞ്ചാബി ഗായകന്‍ സിദ്ധു മൂസ്വാലയെ കൊലപ്പെടുത്തിയ തുര്‍ക്കി നിര്‍മിത സിഗാന ആയുധവും ഇവര്‍ വാങ്ങാനൊരുങ്ങുകയായിരുന്നു. സല്‍മാന്‍ ഖാനെ കൊല്ലാന്‍ 18 വയസ്സിന് താഴെയുള്ള ആണ്‍കുട്ടികളെ പ്രതികള്‍ വാടകയ്‌ക്കെടുത്തിരുന്നു.
എഴുപതോളം പേര്‍ സല്‍മാന്‍ഖാന്റെ ചലനങ്ങള്‍ നിരീക്ഷിക്കുന്നുണ്ടായിരുന്നു. പ്രത്യേകിച്ചും ബാന്ദ്രയിലെ അദ്ദേഹത്തിന്റെ വീട്ടിലും, പന്‍വേലിലെ ഫാംഹൗസിലും ഗൊരേഗാവ് ഫിലിം സിറ്റിയിലും ഇവരുടെ സാന്നിധ്യമുണ്ടായിരുന്നു. 2023 ഓഗസ്റ്റിനും 2024 ഏപ്രിലിനും ഇടയിലാണ് കൊല്ലാനുള്ള പദ്ധതി തയ്യാറാക്കിയത്. എന്നാല്‍ കനത്ത സുരക്ഷയും ബുള്ളറ്റ് പ്രൂഫ് വാഹനവും ഉള്ളതിനാല്‍ കൊലപാതകം നടത്താന്‍ അത്യാധുനിക ആയുധങ്ങള്‍ വേണമെന്ന തീരുമാനത്തിലെത്തി.
പാക് ആയുധ ഇടപാടുകാരനായ ഡോഗറിനെ വീഡിയോകോളിലൂടെ ബന്ധപ്പെടുകയും എകെ47 ഉള്‍പ്പടെയുള്ള അത്യാധുനിക ആയുധങ്ങള്‍ക്ക് വേണ്ടി വിലപേശുകയും ചെയ്തു. ആയുധങ്ങള്‍ നല്‍കാന്‍ ഡോഗര്‍ സമ്മതിച്ചു. വിലയുടെ 50 ശതമാനം നേരത്തെ നല്‍കാനും ബാക്കി തുക ആയുധങ്ങള്‍ ഇന്ത്യയിലെത്തിച്ച ശേഷം നല്‍കാമെന്ന് സുഖയും സമ്മതിച്ചു.
സല്‍മാന്‍ ഖാനെ വധിച്ചശേഷം കന്യാകുമാരിയില്‍ ഒത്തുകൂടാനും അവിടെ നിന്ന് ശ്രീലങ്കയിലേക്കും പിന്നീട് ഇന്ത്യന്‍ അന്വേഷണ ഏജന്‍സികള്‍ക്ക് എത്തിപ്പെടാന്‍ കഴിയാത്ത ഒരു രാജ്യത്തേക്ക് കടക്കാനുമായിരുന്നു ഷൂട്ടര്‍മാരുടെ പദ്ധതിയെന്നും ചാര്‍ജ് ഷീറ്റില്‍ വിശദമാക്കുന്നു. അതേസമയം മുന്‍ മന്ത്രിയും എന്‍സിപി നേതാവുമായ ബാബ സിദ്ദീഖിയുടെ കൊലപാതകത്തിന് പിന്നാലെ ബാന്ദ്രയിലെ വീട്ടില്‍ ശക്തമായ സുരക്ഷ ഏര്‍പ്പെടുത്തിയിട്ടുണ്ട്.
Discussion about this post