ന്യൂഡൽഹി ; ഡൽഹി സിആർപിഎഫ് സ്‌കൂളിന് സമീപം ഉണ്ടായ സ്‌ഫോടനത്തിന്റെ കൂടുതൽ വിവരങ്ങൾ പുറത്ത്. നാടൻ ബോംബാണ് പൊട്ടിത്തെറിച്ചത് എന്നാണ് അധികൃതർ പറയുന്നത്. ബോംബ് സ്‌ക്വാഡ് പരിശോധന നടത്തുകയാണ്. സംഭവസ്ഥലത്ത് നിന്ന് വെളുത്ത പൊടി കണ്ടെത്തിയിട്ടുണ്ട്.
സ്‌ഫോടനം മൂലം 3 മീറ്റർ ചുറ്റളവിൽ പ്രകമ്പനം ഉണ്ടായി. കടയുടെ മുന്നിലുണ്ടായ ചില്ല് പൊട്ടിത്തെറിച്ചു. സ്ഫോടനത്തിന് പിന്നിൽ തീവ്രവാദ ബന്ധമുണ്ടോയെന്ന് പരിശോധിക്കാൻ എൻഐഎ ഉദ്യോഗസ്ഥരുടെ സംഘം സ്ഥലത്തെത്തിയിട്ടുണ്ട്. രോഹിണി ജില്ലയിലെ പ്രസാന്ത് വിഹാറിലുള്ള സിആർപിഎഫ് സ്‌കൂളിന്റെ സമീപത്താണ് പൊട്ടിത്തെറി ഉണ്ടായത്.
രാവിലെ 7.50 നാണ് സംഭവം. സ്‌കൂൾ കെട്ടിടത്തോട് ചേർന്ന് നിൽക്കുന്ന മേഖലയിൽ നിന്ന് വലിയ പുക ഉയരുകയായിരുന്നു. വലിയ ശബ്ദം കേട്ടു എന്നാണ് സമീപവാസികൾ പറയുന്നത്. ആർക്കും പരിക്കില്ലെന്നാണ് വിവരം. സിലിണ്ടർ പൊട്ടിത്തെറിച്ച് വലിയ ശബ്ദം ഉണ്ടായതായിരിക്കാം എന്നായിരുന്നു പ്രാഥമിക വിവരം. എന്നാൽ പരിശോധനയിൽ സിലിണ്ടർ ഒന്നും കണ്ടെത്തിയിട്ടില്ല. കൂടുതൽ വിവരങ്ങൾക്കായി അന്വേഷിച്ചു വരികയാണ് എന്ന് പോലീസ് പറഞ്ഞു.
Discussion about this post