ഓഫീസിലെത്താതെ വീട്ടിലിരുന്നോ ജീവനക്കാരന് അനുയോജ്യമായ അന്തരീക്ഷത്തിലിരുന്നോ ജോലി ചെയ്യുന്ന സംവിധാനമാണ് വർക്ക് ഫ്രം ഹോം. കോവിഡ് 19 വ്യാപനത്തിന് പിന്നാലെയാണ് വർക്ക് ഫ്രം ഹോം കൂടുതലായി വ്യാപകമായി തുടങ്ങിയത്.
എന്നാൽ ഇപ്പോൾ വർക്ക് ഫ്രം നൽകുന്ന മിക്ക കമ്പനികളും ആഴ്ചയിൽ അഞ്ച് ദിവസം ഓഫീസിലെത്തി ജോലി ചെയ്യാൻ ആവശ്യപ്പെടുകയാണ്. ഓഫീസിലെത്തി ജോലി ചെയ്യുന്നതാണ് ജീവനക്കാരുടെ മെച്ചപ്പെട്ട മാനസികാരോഗ്യത്തിനും മികച്ച പ്രകടനത്തിനും നല്ലതെന്നുള്ള പഠനറിപ്പോർട്ടാണ് ഏറ്റവും പുതിയതായി പുറത്തുവരുന്നത്. യുഎസ് ആസ്ഥാനമായി പ്രവർത്തിക്കുന്ന ഗവേഷണ സ്ഥാപനമായ സാപിയൻ ലാബ്സിന്റെ പഠനത്തിലാണ് ഇക്കാര്യം വ്യക്തമാക്കുന്നത്.
65 രാജ്യങ്ങളിൽ നിന്നുള്ള 54,000 പേരാണ് പഠനത്തിൽ പങ്കെടുത്തത്. മാനസികാരോഗ്യം മെച്ചപ്പെടുത്തുന്നതിൽ സഹപ്രവർത്തകരുമായുള്ള ബന്ധവും ജോലിയിലെ ലക്ഷ്യബോധവും പ്രധാന പങ്കുവഹിക്കുന്നതായി പഠനത്തിൽ ഊന്നിപ്പറയുന്നു . വീട്ടിൽ ഇരുന്ന് ജോലി ചെയ്യുന്നവരിൽ ഓഫീസിൽ പോയി ജോലി ചെയ്യുന്നവരെക്കാളും മോശമായ മാനസികാരോഗ്യ ഫലങ്ങളായിരിക്കും അനുഭവിക്കുകയെന്നാണ് കണ്ടെത്തലുകൾ വെളിപ്പെടുത്തുന്നത്.
സഹപ്രവർത്തകരുമായുള്ള നല്ല ബന്ധവും ജോലിയിലുള്ള അഭിമാനവും ലക്ഷ്യവുമാണ് മാനസികക്ഷേമത്തിന് നിർണായകമായ രണ്ട് ഘടകങ്ങൾ. പൂർണമായും വീട്ടിലിരുന്ന് ജോലി ചെയ്യുന്നവരിൽ ദുഃഖം, ഒറ്റപ്പെടൽ, വേർപിരിഞ്ഞു നിൽക്കുന്നതായുള്ള തോന്നൽ എന്നിവ കൂടുതലായി കണ്ടുവരുന്നു.
Discussion about this post