തിരുവനന്തപുരം: സംസ്ഥാനത്ത് ഈ വരുന്ന ദിവസങ്ങളിൽ സ്വർണ്ണം വാങ്ങാനൊരുങ്ങുന്നവർക്ക് തിരിച്ചടിയായി സ്വർണ്ണ വില വർദ്ധനവ്. ഒരു പവൻ സ്വർണത്തിന് 480 രൂപയുടെ വർദ്ധനവാണുണ്ടായത്. ഇതോടെ ഒരു പവൻ സ്വർണത്തിന്റെ വില 59,000 രൂപയായി. ഈ മാസത്തെ ഏറ്റവും ഉയർന്ന സ്വർണനിരക്കാണ് ഇന്ന് രേഖപ്പെടുത്തിയിരിക്കുന്നത്.
നിലവിൽ ഒരു ഗ്രാം 22 കാരറ്റ് സ്വർണത്തിന്റെ വില 7,375 രൂപയും ഒരു ഗ്രാം 24 കാരറ്റ് സ്വർണത്തിന്റെ വില 8,045 രൂപയുമാണ്. കഴിഞ്ഞ ദിവസം ഒരു പവൻ സ്വർണത്തിന്റെ വില 58,520 രൂപയായിരുന്നു.
ഡോളറിന്റെ മൂല്യ വർദ്ധനവാണ് ഇപ്പോഴത്തെ വില വർദ്ധനവിന്റെ പ്രധാന കാരണമെന്നാണ് ആഗോളവിപണി വ്യക്തമാക്കുന്നത്. ദീപാവലി ആഘോഷങ്ങളെത്തിയതോടെ സ്വർണത്തിന്റെ ഡിമാന്റ് കൂടാനാണ് സാദ്ധ്യത.ഇതോടു കൂടി വരും ദിവസങ്ങളിൽ സ്വർണ്ണ വില ഇനിയും കൂടുമെന്നാണ് വിലയിരുത്തപ്പെടുന്നത്.
രാജ്യാന്തര വിപണിയിലെ വില ഔൺസിന്(28.35 ഗ്രാം) 2,745 ഡോളർ വരെ ഉയർന്നതും ഡോളറിനെതിരെ രൂപയുടെ മൂല്യം 84 വരെ താഴ്ന്നതുമാണ് സ്വർണവിലയിൽ കുതിപ്പുണ്ടാക്കിയത്.
Discussion about this post