തിരുവനന്തപുരം: സംസ്ഥാനത്ത് സ്വർണ വിലയിൽ വീണ്ടും കുറഞ്ഞു. 120 രൂപയാണ് ഇന്ന് കുറഞ്ഞത്. ഇതോടെ ഒരു പവൻ സ്വർണത്തിന്റെ വില 58,840 രൂപയായി മാറി. ഗ്രാമിന് 15 രൂപയാണ് കുറഞ്ഞത്. 7355 രൂപയാണ് ഒരു ഗ്രാം സ്വർണത്തിന്റെ വില.ഉടൻ തന്നെ 60,000 തൊടുമെന്ന് തോന്നിപ്പിച്ച ഘട്ടത്തിൽ വെള്ളിയാഴ്ചയും ശനിയാഴ്ചയുമായി 680 രൂപ കുറഞ്ഞാണ് 59,000ൽ താഴെ എത്തിയത്. 21 ദിവസത്തിനിടെ ഏകദേശം 3500 രൂപ വർധിച്ച ശേഷമാണ് നാലുദിവസം കൊണ്ട് 240 രൂപതാഴ്ന്നത്.
എന്നാൽ ഈ താഴ്ച താത്ക്കാലികമാണെന്നും ഡിസംബറോടെ സ്വർണവില പുതിയ റെക്കോർഡുകൾ ഭേദിക്കുമെന്നുമാണ് റിപ്പോർട്ടുകൾ. ഡോളർ കരുത്ത് വർധിക്കുന്നു എന്നതാണ് സ്വർണലവില കുറയാനുള്ള പ്രധാന കാരണമായി പറയുന്നത്. അതേസമയം, അന്തർദേശീയ സാമ്പത്തിക-രാഷ്ട്രീയ സാഹചര്യം ആശങ്കയായി തുടരുന്നതിനാൽ വരുംദിവസങ്ങളിൽ വില വർധിക്കാനുള്ള സാധ്യത തള്ളാനാകില്ലെന്നാണ് വിദഗ്ധർ പറയുന്നത്.
ആഗോള വിപണിയിൽ സ്വർണവിലയിൽ കാര്യമായ കുറവുണ്ടായിട്ടുണ്ട്. ഔൺസ് സ്വർണത്തിന് 2800 ഡോളറിലേക്ക് കുതിച്ച വില 2730 ഡോളറിലെത്തി. ഇതേ ട്രെൻഡ് തുടർന്നാൽ നാളെയും സ്വർണവില കുറയും. 2016ലെ അമേരിക്കൻ പ്രസിഡന്റ് തിരഞ്ഞെടുപ്പ് കാലത്ത് ട്രംപ് ജയിച്ച വേളയിൽ സ്വർണവില കുതിച്ചിരുന്നു. സമാനമായ സാഹചര്യം ഇത്തവണയുണ്ടാകുമോ എന്ന് കാത്തിരുന്ന് കാണേണ്ടി വരും.
