അയ്യപ്പഭക്തർക്ക് സൗജന്യ വൈഫൈ സൗകര്യം; ഫോണിൽ സെറ്റ് ചെയ്യേണ്ടത് ഇങ്ങനെ

പത്തനംതിട്ട: ശബരിമലയിലെത്തുന്ന ഭക്തർക്ക് കണക്ടിവിറ്റി നെറ്റ്വർക്ക് ഉറപ്പാക്കാൻ ഒരുങ്ങി ബിഎസ്എൻഎൽ. തിരുവിതാകൂർ ദേവസ്വം ബോർഡുമായി സഹകരിച്ചാണ് ഇന്റർനെറ്റ് സൗകര്യം ഒരുക്കുന്നത്. ഒരു സിമ്മിൽ അര മണിക്കൂർ വീതം സൗജന്യമായി വൈഫൈ ഉപയോഗിക്കാനാണ് സൗകര്യമൊരുക്കിയത്. പദ്ധതിയുടെ ഉദ്ഘാടനം പമ്പയിൽ നടന്ന ചടങ്ങിൽ ദേവസ്വം വകുപ്പ് മന്ത്രി വി എൻ വാസവൻ നിർവഹിച്ചു.

നിലയക്കൽ മുതൽ സന്നിധാനം വരെ 48 ഇടങ്ങളിൽ വൈ-ഫൈ ഹോട്ട് സ്പോട്ടുകൾ സ്ഥാപിച്ചതായി ബി എസ് എൻ എൽ ശബരിമല ഓഫീസ് ഇൻ ചാർജ് എസ്. സുരേഷ് കുമാർ പറഞ്ഞു. ശബരിമല, പമ്പ, നിലക്കൽ എന്നിവിടങ്ങളിൽ പൊതു വൈ-ഫൈ സേവനമാണ് ബിഎസ്എൻഎൽ നൽകുന്നത്. തിരുവതാംകൂർ ദേവസ്വം ബോർഡുമായി സഹകരിച്ചാണ് ബിഎസ്എൻഎൽ നെറ്റ്വർക്ക് വിപുലമായി ഒരുക്കിയിരിക്കുന്നത്. ഇതിന് പുറമെ ശബരിമല പാതയിൽ 4ജി ടവറുകളും ബിഎസ്എൻഎൽ ഒരുക്കിയിട്ടുണ്ട്.

ശബരിമലയിലും നിലയ്ക്കലിലും പമ്പയിലും ബിഎസ്എൻഎല്ലിൻറെ വൈ-ഫൈ സേവനം ലഭിക്കാൻ ഫോണിലെ വൈ-ഫൈ ഓപ്ഷൻ ആദ്യം ഓണാക്കുക. ഇതിന് ശേഷം സ്‌ക്രീനിൽ കാണിക്കുന്ന ബിഎസ്എൻഎൽ വൈ-ഫൈ (BSNL WiFi) എന്ന നെറ്റ്വർക്ക് ഓപ്ഷൻ സെലക്ട് ചെയ്യുക. അപ്പോൾ തുറന്നുവരുന്ന വെബ്പേജിൽ നിങ്ങളുടെ പത്ത് അക്ക മൊബൈൽ നമ്പർ ടൈപ്പ് ചെയ്ത് Get PIN ക്ലിക്ക് ചെയ്യുക. ഫോണിൽ എസ്എംഎസ് ആയി ലഭിക്കുന്ന ആറക്ക പിൻ നമ്പർ സമർപ്പിച്ചാൽ ഉടനടി ബിഎസ്എൻഎൽ വൈ-ഫൈ ലഭിക്കും.