റായ്‌പൂർ : വെള്ളിയാഴ്ച പ്രഭാഷണ വിഷയങ്ങൾക്ക് സംസ്ഥാനത്തുടനീളമുള്ള പള്ളികൾ മുൻകൂർ അനുമതി തേടണമെന്ന് നിർദ്ദേശം കൊണ്ടുവന്ന് ഛത്തീസ്ഗഢ് വഖഫ് ബോർഡ്. പ്രഭാഷണങ്ങൾ മതപരമായ പഠിപ്പിക്കലുകളിൽ ശ്രദ്ധ കേന്ദ്രീകരിക്കുന്നതും വിവാദപരമോ പ്രകോപനപരമോ ആയ ഉള്ളടക്കം ഒഴിവാക്കാനും ലക്ഷ്യമിട്ടുള്ള തീരുമാനത്തിന്റെ ഭാഗമാണ് ഇത്തരത്തിൽ ഒരു നിർദ്ദേശം. എന്നാൽ വലിയ വിവാദങ്ങൾക്കാണ് ഇത് തുടക്കമിട്ടിട്ടുള്ളത്.
“പള്ളികൾ മതപരമായ പഠിപ്പിക്കലുകൾ നൽകുന്ന ആത്മീയ ഇടങ്ങളായി തുടരണം. ഈ ലക്ഷ്യത്തിൽ നിന്നും ഏതെങ്കിലും രീതിയിൽ പള്ളികൾ വ്യതിചലിക്കുന്നത് തടയാനാണ് ഇപ്പോൾ കൊടുത്തിരിക്കുന്ന നിർദ്ദേശം. നിർദ്ദേശത്തിന് പിന്നിലെ യുക്തി വിശദീകരിച്ചുകൊണ്ട് ബോർഡ് ചെയർമാൻ സലിം രാജ് പറഞ്ഞു.
പുതിയ നിയമം നവംബർ 22 മുതൽ പ്രാബല്യത്തിൽ വരും, മുത്തവല്ലികൾ (മസ്ജിദ് സൂക്ഷിപ്പുകാർ) ഇത് പാലിച്ചില്ല എങ്കിൽ നിയമ നടപടികളിലേക്ക് വരെ ഇത് നയിച്ചേക്കാം.
ഒരു വാട്ട്‌സ്ആപ്പ് ഗ്രൂപ്പിലൂടെ പ്രസംഗ വിഷയങ്ങൾ നിരീക്ഷിക്കുന്നത് ഈ പ്രക്രിയയിൽ ഉൾപ്പെടുന്നു, അവിടെ സംസ്ഥാനത്തുടനീളമുള്ള മുതവല്ലികൾ നിർദ്ദിഷ്ട വിഷയങ്ങൾ പങ്കിടും. വഖഫ് ബോർഡ് അംഗങ്ങൾ ഈ വിഷയങ്ങൾ അവലോകനം ചെയ്യുകയും എന്തെങ്കിലും സെൻസിറ്റീവായതോ തർക്കവിഷയമോ ആണെങ്കിൽ തിരുത്തലുകൾ വരുത്തുകയും ചെയ്യും. പുതുക്കിയ വിഷയങ്ങൾ വെള്ളിയാഴ്ച പ്രഭാഷണ സമയത്ത് അംഗീകാരം നൽകും.
