മുംബൈ : ഓൺലൈനിൽ സാധനങ്ങൾ വാങ്ങുന്നവരാണോ നിങ്ങൾ? ഓർഡർ ചെയ്തതിനുശേഷം പിന്നീട് വേണ്ടെന്നു തോന്നി ക്യാൻസൽ ചെയ്യണമെങ്കിൽ ഇനി പ്രത്യേകം ഫീസ് നൽകേണ്ടി വരും. ഓർഡറുകൾ റദ്ദാക്കുന്നവർക്ക് ക്യാൻസലേഷൻ ചാർജുകൾ ഏർപ്പെടുത്തുകയാണ് ഓൺലൈൻ ഇ കൊമേഴ്സ് സ്ഥാപനങ്ങൾ.
നിലവിൽ ഫ്ലിപ്കാർട്ടും മിന്ത്രയും ആണ് ക്യാൻസലേഷൻ ചാർജുകൾ ഏർപ്പെടുത്താൻ ഒരുങ്ങുന്നതായി സൂചന ഉള്ളത് . ഓർഡറുകൾ റദ്ദാക്കുമ്പോൾ അവർക്ക് നഷ്ടപ്പെടുന്ന ചെലവുകളും സമയവും നികത്താൻ വിൽപ്പനക്കാരെയും ഡെലിവറി പങ്കാളികളെയും സഹായിക്കാനാണ് ഈ തീരുമാനമെന്നാണ് ഫ്ലിപ്കാർട്ട് സൂചിപ്പിക്കുന്നത്. എങ്കിലും ഇക്കാര്യം ഫ്ലിപ്കാർട്ട് ഔദ്യോഗികമായി പ്രഖ്യാപിച്ചിട്ടില്ല.
സൗജന്യമായി റദ്ദാക്കാൻ കഴിയുന്ന ഒരു നിശ്ചിത സമയപരിധി ഉണ്ടായിരിക്കുമെന്നും ഫ്ലിപ്കാർട്ടുമായി അടുത്ത വൃത്തങ്ങൾ അറിയിക്കുന്നു. ഈ സമയപരിധിക്ക് ശേഷം ഓർഡറുകൾ ക്യാൻസൽ ചെയ്യണമെങ്കിൽ നിശ്ചിത ഫീസ് നൽകേണ്ടതായി വരും. ഫ്ലിപ്പ്കാർട്ടിൻ്റെ അതേ മാതൃ കമ്പനിയുടെ കീഴിൽ വരുന്ന മറ്റൊരു ഷോപ്പിംഗ് സൈറ്റായ മിന്ത്രയ്ക്കും ഈ മാറ്റം ബാധകമായേക്കാം എന്നാണ് സൂചന.
Discussion about this post