ഹൈദരാബാദ്: പുഷ്പ-2 പ്രീമിയര് ഷോയ്ക്കിടെ യുവതി മരിച്ച സംഭവത്തില് ദുരന്തം നടന്ന സന്ധ്യ തിയേറ്ററിന് ഹൈദരബാദ് പോലീസ് കാരണം കാണിക്കൽ നോട്ടീസ് നൽകി. തീയറ്ററിന് ഗുരുതര വീഴ്ചകൾ സംഭവിച്ചതായി പോലീസ് നോട്ടീസില് പറയുന്നു. അല്ലു അർജുൻ എത്തുമെന്ന് പോലീസിനെ തീയറ്റര് അധികൃതര് അറിയിച്ചില്ല ഇല്ലെന്നാണ് നോട്ടീസില് വ്യക്തമാക്കുന്നത്.
തിരക്ക് നിയന്ത്രിക്കാനും സുരക്ഷ ഉറപ്പാക്കാനും തീയറ്ററില്
സംവിധാനം ഉണ്ടായിരുന്നില്ല. വാഹനങ്ങളുടെ പാർക്കിങ്ങിനു ക്രമീകരണം ഉണ്ടായില്ല. അനധികൃതമായി ഫ്ളക്സുകൾ സ്ഥാപിച്ച് ട്രാഫിക്കിന് അടക്കം തടസ്സം ഉണ്ടാക്കി. അല്ലു അര്ജുന്റെ അടക്കം സ്വകാര്യ സുരക്ഷാ ജീവനക്കാർ പൊതുഗതാഗതം തടസ്സപ്പെടുത്തി എന്നതുള്പ്പെടെയുള്ള ഗുരുതരമായ പല വീഴ്ചകളും നോട്ടീസില് ചൂണ്ടിക്കാട്ടുന്നു.
10 ദിവസത്തിനകം നോട്ടീസില് വിശദീകരണം നൽകണമെന്നും മറുപടി തൃപ്തികരമല്ലെങ്കിൽ തീയറ്ററിന് നല്കിയ ലൈസൻസ് റദ്ദാക്കുമെന്നും ഹൈദരബാദ് പോലീസ് മുന്നറിയിപ്പ് നല്കി.
അതേ സമയം പുഷ്പ 2 റിലീസിനിടെ തിരക്കില്പ്പെട്ട് പരിക്കേറ്റ ഒമ്പതുവയസുകാരന് മസ്തിഷ്ക മരണം സംഭവിച്ചതായി അധികൃതർ സ്ഥിരീകരിച്ചു. ഡിസംബർ നാലിന് ഹൈദരാബാദിലെ സന്ധ്യ തിയേറ്ററിലുണ്ടായ തിക്കിലും തിരക്കിലും പെട്ട് അമ്മ രേവതി മരിച്ചിരുന്നു. ‘പുഷ്പ 2’ ൻ്റെ പ്രീമിയറിൽ നടൻ അല്ലു അർജുനെ കാണാൻ ആയിരക്കണക്കിന് ആരാധകർ തിരക്കു കൂടിയതിനെ തുടർന്നാണ് സംഭവം.
ഹൈദരാബാദ് സിറ്റി പോലീസ് കമ്മീഷണർ സി വി ആനന്ദും തെലങ്കാന ഗവൺമെൻ്റ് ഹെൽത്ത് സെക്രട്ടറി ഡോ ക്രിസ്റ്റീനയും സംസ്ഥാന സർക്കാരിന് വേണ്ടി കിംസ് ഹോസ്പിറ്റലിൽ എത്തി. തിക്കിലും തിരക്കിലും പെട്ട് ഓക്സിജൻ്റെ അഭാവം മൂലമാണ് ശ്രീ തേജിന് മസ്തിഷ്ക മരണം സംഭവിച്ചതെന്ന് കമ്മീഷണർ ആനന്ദ് മാധ്യമങ്ങളോട് പറഞ്ഞു.
Discussion about this post