ടോക്കിയോ: റോക്കറ്റ് വിക്ഷേപണത്തില് രണ്ടാം വട്ടവും വിജയം കാണാതെ ജപ്പാനിലെ സ്വകാര്യ ബഹിരാകാശ വിക്ഷേപകരായ സ്പേസ് വണ് കമ്പനി. വിക്ഷേപിച്ച് മിനിറ്റുകള് കഴിയുന്നതിന് മുമ്പ് തന്നെ റോക്കറ്റ് നിയന്ത്രണം നഷ്ടമായി താഴേക്ക് പതിക്കുകയായിരുന്നു. തായ്വാന് ബഹിരാകാശ ഏജന്സിയുടെ ഒന്നുള്പ്പെടെ അഞ്ചോളം ചെറിയ കൃത്രിമ ഉപഗ്രഹങ്ങളാണ് കെയ്റോസ് റോക്കറ്റ് വഹിച്ചിരുന്നത്. ഇവയെ ഭൂമിയില് നിന്ന് 500 കിലോമീറ്റര് അകലെ ഭ്രമണപഥത്തില് വിക്ഷേപിക്കാനായിരുന്നു ശ്രമം.
18 മീറ്റര് ഉയരമുള്ള സോളിഡ്-ഫ്യൂവല് റോക്കറ്റാണ് കെയ്റോസ്. ജപ്പാനിലെ സ്പേസ്പോര്ട്ട് കീയില് നിന്ന് കുതിച്ചുയര്ന്ന് മിനിറ്റുകള്ക്കുള്ളില് കെയ്റോസ് റോക്കറ്റിന് സ്ഥിരത നഷ്ടമായി. ഇതോടെ വിക്ഷേപണം നിര്ത്താന് ശ്രമം ആരംഭിച്ചെന്ന് റോയിട്ടേഴ്സ് റിപ്പോര്ട്ട് ചെയ്തു. ഇതോടെ കൃത്രിമ ഉപഗ്രഹങ്ങള് ബഹിരാകാശത്തേക്ക് വിജയകരമായി അയക്കുന്ന ജപ്പാനിലെ ആദ്യ സ്വകാര്യ കമ്പനിയാവാനുള്ള സ്പേസ് വണ്ണിന്റെ രണ്ടാം ശ്രമത്തിനാണ് തിരിച്ചടി നേരിട്ടത്.
മുമ്പും സ്പേസ് വണ് വിക്ഷേപണത്തില് തിരിച്ചടി നേരിട്ടിരുന്നു. 2024 മാര്ച്ചില് കെയ്റോസ് റോക്കറ്റ് വിക്ഷേപിക്കാന് നടത്തിയ ശ്രമം പരാജയപ്പെട്ടതാണ് ആദ്യ സംഭവം. അന്ന് കുതിച്ചുയര്ന്ന് വെറും അഞ്ച് സെക്കന്ഡുകള്ക്ക് ശേഷം റോക്കറ്റ് പൊട്ടിത്തെറിക്കുകയായിരുന്നു. കാനണ് അടക്കമുള്ള വമ്പന് കമ്പനികളുടെ പിന്തുണയോടെ 2018ലാണ് ജപ്പാനിലെ ആദ്യത്തെ സ്വകാര്യ ബഹിരാകാശ വിക്ഷേപകരായ സ്പേസ് വണ് എന്ന കമ്പനി ആരംഭിച്ചത്.
Discussion about this post